संगमनेर, प्रतिनिधी-
पुण्याहून कोपरगावकडे जात असताना विधान परिषदेचे सभापती प्राध्यापक राम शिंदे यांनी सोमवारी संगमनेर येथे माजी आमदार डॉ. सुधीर तांबे यांच्या निवासस्थानी अचानक भेट दिल्याने राजकीय क्षेत्रात मोठ्या चर्चा सुरू झाल्या आहेत. विशेषतः आमदार सत्यजीत तांबे यांच्या राजकीय प्रवासाच्या पार्श्वभूमीवर, भाजपच्या एका बड्या नेत्याने तांबे यांच्या निवासस्थानी जाऊन केलेली ही अनौपचारिक चर्चा महत्त्वपूर्ण मानली जात आहे.
सोमवारी दुपारी एक वाजेच्या सुमारास प्रा. राम शिंदे संगमनेर येथे पोहोचले. त्यांनी सुरुवातीला शासकीय विश्रामगृहावर विश्रांती घेऊन भाजपच्या काही निवडक पदाधिकाऱ्यांशी संवाद साधला. त्यानंतर महायुतीचे (शिवसेना) आमदार अमोल खताळ यांच्या जनसंपर्क कार्यालयाला भेट देऊन त्यांनी थेट इंदिरानगर येथील डॉ. सुधीर तांबे यांचे निवासस्थान गाठले.
यावेळी त्यांच्यासोबत जालिंदर वाकचौरे उपस्थित होते. सुमारे २० ते २५ मिनिटे चाललेल्या या भेटीत शिंदे यांनी तांबे कुटुंबियांशी आणि उपस्थित कार्यकर्त्यांशी विविध विषयांवर गप्पा मारल्या. तसेच राज्यातील सर्वाधिक मताधिक्य घेत संगमनेरच्या नगराध्यक्षपदी विराजमान झालेल्या नूतन नगराध्यक्ष डॉ. मैथिली तांबे यांना देखील शुभेच्छा दिल्या.
ही भेट केवळ सदिच्छा भेट असल्याचे सांगण्यात येत असले तरी, शिंदे यांच्या दौऱ्याची माहिती भाजपच्या सर्व पदाधिकाऱ्यांना नव्हती. केवळ मोजक्याच नेत्यांच्या उपस्थितीत आणि गुप्तता पाळत ही भेट पार पडल्याने राजकीय तर्कवितर्कांना उधाण आले आहे. कोपरगाव येथे भाजपच्या नगराध्यक्षांचा पदभार स्वीकारण्याचा कार्यक्रम असताना, वाटेत थांबून मुद्दाम तांबे यांच्या घरी जाणे हे भविष्यातील कोणत्या राजकीय समीकरणांचे संकेत आहेत, यावर आता चर्चा रंगू लागली आहे. या भेटीनंतर प्रा. राम शिंदे कोपरगावकडे रवाना झाले.
