संगमनेर, प्रतिनिधी-
शुद्धता आणि गुणवत्तेसाठी महाराष्ट्रभर नावलौकिक मिळवलेल्या राजहंस दूध संघाने आता बेकरी उद्योगात आपले पाऊल टाकले आहे. ‘राजहंस मिल्क अँड बेक्स’ अंतर्गत उत्पादित करण्यात आलेल्या विविध दर्जेदार बेकरी पदार्थांचा भव्य शुभारंभ माजी मंत्री आमदार बाळासाहेब थोरात यांच्या हस्ते करण्यात आला. अमृतवाहिनी शिक्षण संस्थेच्या कृषी महाविद्यालयात आयोजित ‘कळस कृषी व डेअरी प्रदर्शना’च्या उद्घाटन सोहळ्यात या नवीन उपपदार्थांचे अनावरण अत्यंत उत्साहात पार पडले.
याप्रसंगी बाळासाहेब थोरात म्हणाले की, सहकारमहर्षी भाऊसाहेब थोरात यांच्या आदर्श तत्त्वावर संगमनेरचा सहकार उभा असून दूध व्यवसायामुळे ग्रामीण भागात मोठी आर्थिक समृद्धी निर्माण झाली आहे. संगमनेरची ओळख आता ‘दुधाचा तालुका’ म्हणून सर्वदूर पोहोचली असून राजहंसने नेहमीच आपल्या उत्पादनांची गुणवत्ता जपली आहे. या विश्वासार्हतेमुळेच राजहंसच्या दुधासह इतर उपपदार्थांना राज्यभरातून मोठी मागणी असते. आता नव्याने सुरू केलेले बेकरी पदार्थही ग्राहकांच्या पसंतीस उतरून बाजारपेठेत नक्कीच लोकप्रिय ठरतील, असा विश्वास त्यांनी व्यक्त केला. तसेच आगामी काळात ‘राजहंस चहा’ देखील विक्रीसाठी उपलब्ध झाल्यास त्याला मोठी मागणी राहील, असे सूतोवाचही त्यांनी यावेळी केले.
राजहंस दूध संघाने आपल्या गुणवत्तापूर्ण दुधाच्या जोडीला आता ग्राहकांसाठी खमंग बेकरी उत्पादने तयार केली आहेत. यामध्ये प्रामुख्याने मस्का खारी, मिल्क टोस्ट, क्रीम रोल, जीरा बटर, कोकोनट कुकीज, मिल्क कप केक आणि चॉकलेट अशा विविध वैशिष्ट्यपूर्ण पदार्थांचा समावेश आहे. हे सर्व पदार्थ उच्च दर्जाच्या कच्च्या मालापासून तयार करण्यात आले असून ते आता सर्वत्र विक्रीसाठी उपलब्ध झाले आहेत.
यावेळी राजहंस दूध संघाचे चेअरमन रणजितसिंह देशमुख म्हणाले, आमदार बाळासाहेब थोरात यांच्या नेतृत्वाखाली संगमनेर तालुक्यात दररोज सुमारे सात लाख लिटर दुधाची निर्मिती होत आहे. दूध संघाने सातत्याने गुणवत्तेचा आग्रह धरल्यामुळेच इथली उत्पादने श्रेष्ठ ठरली आहेत.
माजी आमदार डॉ. सुधीर तांबे यांनीही संगमनेरच्या सहकार मॉडेलचे कौतुक करताना सांगितले की, सहकारातून सामान्य माणसाच्या जीवनात आर्थिक स्थिरता आणि आनंद निर्माण करण्याचे काम अमृत उद्योग समूहाने यशस्वीपणे केले आहे.
या सोहळ्याला व्यासपीठावर माजी आमदार डॉ. सुधीर तांबे, राजहंस दूध संघाचे चेअरमन रणजितसिंह देशमुख, माधवराव कानवडे, माजी नगराध्यक्ष दुर्गाताई तांबे, नगराध्यक्ष डॉ. मैथिलीताई तांबे, थोरात कारखान्याचे उपाध्यक्ष पांडुरंग पाटील घुले, लक्ष्मणराव कुटे, कैलासराव वाकचौरे, दूध संघाचे व्हाईस चेअरमन राजेंद्र चकोर, विक्रम थोरात, संतोष मांडेकर, शरयूताई देशमुख, डॉ. जयश्रीताई थोरात, प्रकल्प प्रमुख सागर वाकचौरे, कार्यकारी संचालक डॉ. सुजित खिलारी, मुख्य कार्यकारी अधिकारी अनिल शिंदे आणि कारखाना कार्यकारी संचालक जगन्नाथ घुगरकर आदींसह अमृत उद्योग समूहातील विविध संस्थांचे पदाधिकारी व ग्रामस्थ मोठ्या संख्येने उपस्थित होते.
कृषी प्रदर्शनाचे मुख्य आकर्षण- या कार्यक्रमासोबतच आयोजित कृषी प्रदर्शनात राज्यभरातून तब्बल २०० वेगवेगळ्या जातींच्या गाई दाखल झाल्या असून, हे या प्रदर्शनाचे मुख्य आकर्षण ठरत आहे. तालुक्यातील व जिल्ह्यातील शेतकरी, महिला आणि युवकांनी हे प्रदर्शन पाहण्यासाठी मोठी गर्दी केली आहे. कार्यक्रमाचे प्रास्ताविक व आभार प्रदर्शन कार्यकारी संचालक डॉ. सुजित खिलारी यांनी केले.
