संगमनेर, प्रतिनिधी –
तालुक्यातील एका अल्पवयीन मुलीला प्रेमाचे आमिष दाखवून पळवून नेणाऱ्या सराईत गुन्हेगारावर ‘पोक्सो’सह ‘मोक्का’ अंतर्गत कठोर कारवाई करावी, अशी मागणी ‘ह्युमन इनोव्हेशन ऑर्गनायझेशन – सर्वांसाठी मानवाधिकार संघटना’ यांच्या वतीने पोलीस प्रशासनाकडे करण्यात आली आहे. यासंदर्भात संघटनेच्या वतीने उपविभागीय पोलीस अधिकारी यांना लेखी निवेदन देऊन प्रशासनाचे लक्ष वेधण्यात आले आहे.
निवेदनात नमूद केल्यानुसार, कलिम पठाण या सराईत गुन्हेगाराने पाच महिन्यांपूर्वी एका अल्पवयीन मुलीचे अपहरण केले होते. पोलीस प्रशासनाने ३१ जानेवारी २०२६ रोजी आरोपीला मुलीसह ताब्यात घेतले आहे. हा आरोपी सराईत असून त्याच्यावर यापूर्वीही चोरी, घरफोडी, दरोडा आणि खुनाचा प्रयत्न यांसारखे अनेक गंभीर गुन्हे दाखल आहेत. अशा गुन्हेगारी पार्श्वभूमीच्या व्यक्तीवर भारतीय न्याय संहिता आणि ‘पोक्सो’ अंतर्गत तातडीने कठोर गुन्हा दाखल करावा, अशी आग्रही मागणी करण्यात आली आहे.
यासोबतच, पीडित मुलीची तज्ज्ञ डॉक्टरांकडून तातडीने वैद्यकीय तपासणी करून तिला न्याय मिळवून द्यावा आणि आरोपीचा गुन्हेगारी इतिहास पाहता त्याच्यावर ‘मोक्का’ अंतर्गत कारवाई करून कठोर शासन व्हावे, असेही निवेदनात म्हटले आहे. पीडित मुलगी आणि तिच्या कुटुंबाला भविष्यात कोणताही धोका निर्माण होऊ नये, यासाठी त्यांना आवश्यक पोलीस संरक्षण देण्याची मागणीही करण्यात आली आहे. या प्रकरणात दिरंगाई झाल्यास किंवा आरोपीला पाठीशी घालण्याचा प्रयत्न झाल्यास तीव्र आंदोलन छेडण्याचा इशारा उत्तर महाराष्ट्र अध्यक्षा शेख बानोबी लियाकत यांनी दिला आहे.
