मंदिरातील चांदीच्या पादुका चोरणारे त्रिकुट संगमनेर तालुका पोलीसांकडून जेरबंद; घाटातील लुटीचीही उकल! १ लाख ८२ हजारांचा मुद्देमाल जप्त

संगमनेर, प्रतिनिधी –

चंदनापुरी (संगमनेर) येथील साईबाबा मंदिराच्या गाभाऱ्यातून चांदीच्या पादुका आणि एका भाविकाचा मोबाईल चोरणाऱ्या तीन सराईत गुन्हेगारांना संगमनेर तालुका पोलिसांनी अत्यंत शिताफीने अटक केली आहे. या कारवाईत चोरीच्या पादुकांसह, गुन्ह्यात वापरलेली मोटारसायकल आणि रोख रक्कम असा एकूण १ लाख ८२ हजार रुपये किमतीचा मुद्देमाल हस्तगत करण्यात आला आहे.

घटनेची सविस्तर माहिती अशी की, २९ जानेवारी ते ३० जानेवारी २०२६ च्या दरम्यान मध्यरात्री अज्ञात चोरट्यांनी चंदनापुरी येथील साईबाबा मंदिराचे कडी-कोयंडा उघडून पालखीतील चांदीच्या पादुका चोरून नेल्या होत्या. तसेच परिसरात झोपलेले साक्षीदार संजय गाडेकर यांचा मोबाईलही लंपास केला होता. याप्रकरणी संगमनेर तालुका पोलीस ठाण्यात गुन्हा दाखल करण्यात आला होता. गुन्ह्याचा कोणताही धागादोरा नसताना वरिष्ठ अधिकाऱ्यांच्या मार्गदर्शनाखाली तपास पथकाने तांत्रिक विश्लेषण आणि गुप्त बातमीदारांच्या मदतीने आरोपींचा शोध सुरू केला.

या तपासादरम्यान संशयित आरोपी श्रीरामपूर येथील एकता चौक परिसरात ओळख लपवून राहत असल्याची माहिती पोलिसांना मिळाली. त्यानुसार पोलिसांनी तिथे सापळा लावून प्रशांत दीपक मावस (रा. खांडगाव, संगमनेर), रोहित विठ्ठल साळवे (रा. सिन्नर, नाशिक) आणि अतुल संजय बटवाल (रा. ढोलेवाडी, संगमनेर) या तिघांना ताब्यात घेतले. पोलिसांनी त्यांना विश्वासात घेऊन सखोल चौकशी केली असता त्यांनी या चोरीची कबुली दिली. धक्कादायक बाब म्हणजे, याच आरोपींनी चंदनापुरी घाटात एका बंद पडलेल्या गाडीच्या चालकाला कोयत्याचा धाक दाखवून लुटल्याची कबुली देखील दिली आहे.

आरोपींनी चोरलेल्या ९० हजार रुपये किमतीच्या ३६० ग्रॅम वजनाच्या चांदीच्या पादुका संगमनेर येथील सोनार सिद्धेश संदीप महाले याला विकल्याचे तपासात निष्पन्न झाले. पोलिसांनी या पादुकांसह ७० हजार रुपये किमतीची मोटारसायकल (क्र. एम.एच.१२ एल.के. ९०७६), २० हजार रुपयांचा मोबाईल आणि २ हजार रुपये रोख असा मुद्देमाल जप्त केला आहे. सध्या तिन्ही आरोपी पोलीस कोठडीत आहे.

ही कारवाई जिल्हा पोलीस अधिक्षक सोमनाथ घार्गे, अपर पोलीस अधिक्षक सोमनाथ वाकचौरे आणि उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली पोलीस निरीक्षक प्रवीण साळुंखे आणि त्यांच्या पथकाने केली असून पुढील तपास सहाय्यक फौजदार बी. वाय. टोपले करत आहेत.