संगमनेरमध्ये दरोड्याच्या तयारीत असलेली सलीम-अलीम टोळी जेरबंद; पोलिसांची मोठी कारवाई

संगमनेर, प्रतिनिधी –

संगमनेर शहर आणि परिसरात अनेक घरफोड्या व जबरी चोऱ्या करणाऱ्या कलीम-अलीम टोळीचा संगमनेर शहर तपास पथकाने पर्दाफाश केला आहे. संगमनेर शहरातील कोल्हेवाडी रोड परिसरात दिनांक १ फेब्रुवारी २०२६ च्या रात्री २३:०० वाजेपासून ते २ फेब्रुवारी २०२६ च्या पहाटे ०२:३० वाजेच्या सुमारास दरोडा टाकण्याच्या तयारीत असताना पोलिसांनी या टोळीला रंगेहात अटक केली.

मिळालेल्या माहितीनुसार, पोलीस उपनिरीक्षक संतोष पगारे, पोलीस हेड कॉन्स्टेबल बाबासाहेब सातपुते आणि पोलीस कॉन्स्टेबल विजय खुळे हे शासकीय वाहनाने रात्रगस्त घालत असताना त्यांना गुप्त बातमीदाराकडून माहिती मिळाली की, कोल्हेवाडी रोड लगत काही इसम मोटारसायकलवर अंधाराचा फायदा घेऊन दरोड्याच्या साहित्यासह फिरत आहेत. बातमी मिळताच पोलिसांनी पंचांना बोलावून सापळा रचला. पोलिसांची गाडी पाहताच आरोपींनी पळून जाण्याचा प्रयत्न केला, मात्र पथकाने त्यांना जागीच पकडून त्यांची झडती घेतली असता त्यांच्याकडे घातक शस्त्रे आणि मोटारसायकल मिळून आल्या.

या कारवाईत पोलिसांनी सलीम अकबर पठाण (वय २६, रा. जमजम कॉलनी), अलीम अकबर पठाण (वय २४, रा. जमजम कॉलनी), वसीम मन्सुर शेख (वय ३८, रा. मदिनानगर), निलेश बाळासाहेब शेळके (वय ४०, रा. रोहमवाडी), सलमान अकबर पठाण (वय २४, रा. कोल्हेवाडी रोड) आणि अनमोल कुरनवाशी चव्हाण (वय १९, रा. घुलेवाडी) या सहा जणांना अटक केली आहे.

त्यांच्याकडून ४०,००० रुपये किमतीची काळ्या रंगाची हिरो होंडा स्प्लेंडर (MH17DD0183), ६०,००० रुपये किमतीची विना नंबरची होंडा शाईन, ४५,००० रुपये किमतीची प्लॅटिना मोटारसायकल आणि एकूण चार मोबाईल फोन जप्त करण्यात आले आहेत. तसेच झडतीमध्ये एक लोखंडी गुप्ती, दोन कोयते, पकड, स्क्रू ड्रायव्हर, लोखंडी कुऱ्हाड आणि दरोड्यासाठी वापरण्यात येणारी मिरचीची पूड असा एकूण १,७६,९०० रुपयांचा मुद्देमाल जप्त केला आहे.

ही कारवाई जिल्हा पोलीस अधीक्षक सोमनाथ घार्गे, अपर पोलीस अधीक्षक सोमनाथ वाघचौरे आणि उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली पोलीस निरीक्षक समीर बारवकर, पोलीस उपनिरीक्षक श्रीकांत सावंत, संतोष पगारे, बाबासाहेब सातपुते, विजय खुळे, राहुल शिवाजी क्षीरसागर, सागर मच्छिंद्र नागरे, राहुल कैलास पांडे, विजय तबाजी आगलावे आणि चालक लक्ष्मण दत्तु खेडकर यांच्या पथकाने यशस्वी केली.

या प्रकरणी पोकाँ विजय आण्णा खुळे यांच्या फिर्यादीवरून गुन्हा रजिस्टर नंबर ११८/२०२६ भारतीय न्याय संहिता २०२३ चे कलम ३१०(४), ३१०(६) प्रमाणे गुन्हा दाखल करण्यात आला असून पुढील तपास पोलीस उपनिरीक्षक श्रीकांत सावंत करत आहेत.