संगमनेर, प्रतिनिधी –
संगमनेर तालुक्यातील देवतळे (देवगाव) आणि देवगड (हिवरगाव पावसा) या दोन गावांमधील श्री खंडोबा मंदिरांमध्ये चोरीची घटना उघडकीस आली आहे. माघ शुद्ध पौर्णिमेनिमित्त नुकताच येथे मोठा यात्रोत्सव पार पडला होता, ज्यामध्ये भाविकांनी मोठ्या प्रमाणात दान अर्पण केले होते. या संधीचा फायदा घेत चोरट्यांनी सोमवारी रात्री दोन्ही मंदिरांमधील गाभाऱ्यात प्रवेश करून कटरच्या साहाय्याने दानपेट्या कापल्या आणि त्यातील रोकड लंपास केली. विशेष म्हणजे, चोरट्यांनी केवळ कागदी नोटांची चोरी केली असून चिल्लर पैसे मंदिरांतच सोडून दिले आहेत.
या घटनेची माहिती मंगळवारी सकाळी उघडकीस आल्यानंतर परिसरात मोठी खळबळ उडाली. या दोन्ही मंदिरांमधील अंतर अवघ्या दोन किलोमीटरचे असून, सीसीटीव्ही फुटेजमध्ये चोरटे चोरी करताना कैद झाले आहेत. फुटेजमधील हालचालींवरून दोन्ही ठिकाणच्या चोऱ्या एकाच टोळीने केल्या असल्याचा संशय पोलिसांनी व्यक्त केला आहे. याप्रकरणी संगमनेर शहर आणि तालुका पोलीस ठाण्यात गुन्ह्याची नोंद करण्यात आली आहे.
घटनेचे गांभीर्य ओळखून तालुका पोलीस ठाण्याचे पोलीस निरीक्षक प्रवीण साळुंके आणि शहर पोलीस ठाण्याचे पोलीस निरीक्षक समीर बारवकर यांनी तातडीने घटनास्थळी भेट देऊन पाहणी केली. पोलीस सध्या सीसीटीव्ही फुटेज आणि इतर पुराव्यांच्या आधारे चोरट्यांचा शोध घेत आहेत. यात्रेच्या सांगतेनंतर लगेचच झालेल्या या चोरीमुळे भाविकांमध्ये संताप व्यक्त केला जात आहे.
