संगमनेरात नशेच्या दोघा सौदागरांना बेड्या; पोलिसांचा दणका, २५ हजाराचा गांजा जप्त!

संगमनेर, प्रतिनिधी – 

शांतताप्रिय संगमनेर शहराला अमली पदार्थांच्या विळख्यात ओढणाऱ्या नशेच्या सौदागरांच्या मुसक्या आवळण्यात संगमनेर शहर पोलिसांना यश आले आहे. राजापूरच्या गुंजाळवाडी रस्त्यावरील लक्ष्मीनगर भागात व कुरणमध्ये छुप्या पद्धतीने चालणाऱ्या गांजा विक्रीच्या अड्ड्यावर पोलिसांनी छापा टाकून दोन तरुणांना बेड्या ठोकल्या आहेत. त्यांच्याकडून सुमारे २५ हजार रुपये किमतीचा ९९७ ग्रॅम सुका गांजा जप्त करण्यात आला असून, या कारवाईमुळे नशेच्या छुप्या बाजारात मोठी खळबळ उडाली आहे.

मिळालेल्या माहितीनुसार, मंगळवारी रात्री आणि बुधवारी पहाटेच्या सुमारास संगमनेर शहर पोलीस ठाण्याचे अधिकारी आणि कर्मचाऱ्यांनी ही कारवाई केली. मुन्ना अब्बास शेख (वय २६) आणि संजय उर्फ संदीप राजू मालुंजकर (वय २६) अशी अटक करण्यात आलेल्या आरोपींची नावे आहेत. हे दोन्ही तरुण संगमनेर परिसरातीलच रहिवासी असून, त्यांनी शहरात अमली पदार्थांचे जाळे पसरवण्याचा प्रयत्न केला होता. मात्र, पोलिसांच्या सतर्कतेमुळे त्यांचा हा डाव उधळला गेला आहे.

काही तरुण संशयास्पदरीत्या अमली पदार्थांची विक्री करत असल्याची कुणकुण पोलिसांना लागली होती. त्यानुसार पोलिसांनी सापळा रचला. या छाप्यामध्ये पोलिसांनी आरोपींकडून २४ हजार १२५ रुपये किमतीचा ९६५ ग्रॅम आणि ८०० रुपये किमतीचा ३२ ग्रॅम असा एकूण २४ हजार ९२५ रुपयांचा गांजा जप्त केला आहे. अमली औषधे द्रव्य मन:प्रभावी पदार्थ अधिनियम १९८५ (NDPS Act) च्या कलम ८(क) आणि २२(ब)(ii)(अ) प्रमाणे पोलीस कॉन्स्टेबल सागर मच्छिंद्र नागरे यांच्या फिर्यादीवरून दोघांवर गुन्हे दाखल करण्यात आले आहेत. पुढील तपास पोलीस उपनिरीक्षक श्रीकांत सावंत करत असून, या रॅकेटचे धागेदोरे आणखी कुठे पसरले आहेत का, याचा शोध आता पोलीस घेत आहेत. दरम्यान यासंदर्भातील अधिक माहितीसाठी पोलीस उपनिरीक्षक सावंत यांच्याशी संपर्क केला असता फारशी माहिती मिळू शकली नाही.