आईच्याच मित्राने ओलांडली मर्यादा; अल्पवयीन मुलीवर अत्याचार करणारा आरोपी पोलिसांकडून जेरबंद

पुणे :

शहरात माणुसकीला काळीमा फासणारी एक धक्कादायक घटना समोर आली आहे, जिथे एका १३ वर्षीय मुलीवर तिच्या आईच्याच मित्रानो लैंगिक अत्याचार केल्याचा प्रकार घडला आहे. याप्रकरणी वारजे पोलिसांनी तत्परता दाखवत २९ वर्षीय आरोपी ज्ञानेश्वर रायरीकर याला बेड्या ठोकल्या आहेत.

पीडित मुलीची आई विधवा असून आरोपी ज्ञानेश्वर हा त्यांचा जुना मित्र असल्याने कुटुंबाचा त्याच्यावर पूर्ण विश्वास होता. याच विश्वासाचा गैरफायदा घेत, मुलीला शाळेत सोडण्याचे आमिष दाखवून आरोपीने तिला डीपी रोड परिसरात नेले. तिथे शाळेत पोहोचवण्याऐवजी त्याने गाडी थांबवून अल्पवयीन मुलीवर लैंगिक अत्याचार केला.

या घटनेचा उलगडा तेव्हा झाला जेव्हा मुलीला शाळेत पोहोचायला अर्धा तास उशीर झाला. मुलगी घरी परतल्यानंतर आईने तिला उशिराचे कारण विचारले असता, मुलीने घाबरत दिलेली उत्तरे ऐकून आईला संशय आला. आईने वेळ न घालवता थेट पोलीस स्टेशन गाठून तक्रार दिली. वारजे पोलिसांनी या घटनेचे गांभीर्य ओळखून तातडीने पोक्सो अंतर्गत गुन्हा दाखल केला आणि आरोपीला अटक केली. ही घटना विश्वासाच्या नात्याला तडा देणारी ठरली असून परिसरात संताप व्यक्त केला जात आहे.