पोलिसांची धडाकेबाज कारवाई; शेतकऱ्याच्या शेतातून संत्री चोरणारा टेम्पोसह जेरबंद

अहिल्यानगर :

शेतकऱ्याने कष्टाने पिकवलेली संत्री चोरून नेणाऱ्या एका अट्टल चोराला नगर तालुका पोलिसांनी २४ तासांच्या आत अटक केली आहे. या कारवाईत पोलिसांनी ३ लाख २० हजार ४५० रुपयांचा मुद्देमाल हस्तगत केला असून, यामध्ये चोरीची संत्री, रिकामे कॅरेट आणि गुन्ह्यात वापरलेला टेम्पो जप्त करण्यात आला आहे.

मिळालेल्या माहितीनुसार, दशमीगव्हाण येथील शेतकरी पोपट पांडुरंग म्हस्के यांनी त्यांच्या शेतात संत्री विक्रीसाठी नेण्याकरिता ११० रिकामे कॅरेट ठेवले होते. १९ फेब्रुवारीच्या रात्री अज्ञात चोरट्यांनी शेतात प्रवेश करून संत्र्यांची चोरी केली. २० फेब्रुवारीला सकाळी ६ वाजता शेतकरी शेतात गेले असता, त्यांना ९८ कॅरेटसह झाडांवरील फळे चोरीला गेल्याचे लक्षात आले. शेतात टेम्पोच्या टायरचे निशाण आढळल्याने त्यांनी तात्काळ नगर तालुका पोलीस ठाण्यात धाव घेतली.

या घटनेचे गांभीर्य ओळखून सहायक पोलीस निरीक्षक गणेश वारुळे यांनी तपासाला वेग दिला. गुप्त बातमीदाराकडून मिळालेल्या माहितीनुसार, संशयित आरोपी इरफान बाबा शेख (रा. निंबोडी, ह.मु. मुकुंदनगर, अहिल्यानगर) हा चोरीची संत्री शेेंडी (ता. नगर) परिसरात विक्रीसाठी घेऊन गेल्याचे समजले.

पोलीस पथकाने सापळा रचून आरोपीला ताब्यात घेतले. त्याच्याकडून मुद्देमाल जप्त करण्यात आला आहे. ही कारवाई पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे आणि उपविभागीय पोलीस अधिकारी शिरीष वमने यांच्या मार्गदर्शनाखाली पार पडली. या पथकात सहाय्यक पोलीस निरीक्षक गणेश वारुळे, दत्तात्रय हिंगडे, शैलेश सरोदे, महेश भवार, नितीन शिंदे, सुभाष थोरात, मंगेश खरमाळे, रघुनाथ कुलांगे, विक्रांत भालसिंग आणि विकास शिंदे यांचा समावेश होता.