संगमनेरात नशेबाजांचा उच्छाद: पोलिसांच्या नाकाखाली मृत्यूचा बाजार, तरुणावर कोयत्याने प्राणघातक हल्ला; कायदा सुव्यवस्था राखण्यात पोलीस यंत्रणा अपयशी

संगमनेर, प्रतिनिधी – 

सणासुदीच्या पार्श्वभूमीवर संगमनेर शहरात एकीकडे पोलीस कडेकोट बंदोबस्त आणि रूटमार्च काढून आपण सज्ज असल्याचे मिरवत असताना, दुसरीकडे गुन्हेगारांनी पोलिसांना उघड आव्हान दिल्याची खळबळजनक घटना समोर आली आहे. शहरात नशेबाजांनी अक्षरशः उच्छाद मांडला असून किरकोळ कारणावरून इंदिरानगरमध्ये रविवारी रात्री एका तरुणावर कोयत्याने प्राणघातक हल्ला केल्याचा प्रकार समोर आल्याने संपूर्ण शहरात भीतीचे आणि तणावाचे वातावरण निर्माण झाले आहे. संगमनेरमध्ये कायदा सुव्यवस्था राखण्यात पोलीस यंत्रणा सपशेल अपयशी ठरली आहे.

मिळालेल्या माहितीनुसार, इंदिरानगर परिसरातील रहिवासी आणि रुद्र प्रतिष्ठानचे कार्यकर्ते रोहित वाळके याच्यावर अज्ञात इसमाने कोयत्याने भीषण हल्ला केला. हा हल्ला इतका भयानक होता की रोहित वाळके यामध्ये गंभीर जखमी झाले असून त्यांची प्रकृती चिंताजनक असल्याचे सांगण्यात येत आहे. त्याला तातडीने संगमनेरमधील खासगी हॉस्पिटलमध्ये उपचारासाठी दाखल करण्यात आले आहे. या घटनेची माहिती मिळताच इंदिरानगर परिसरातील शेकडो नागरिकांनी हॉस्पिटलबाहेर मोठी गर्दी केली होती, यामुळे काही काळ परिसरात तणाव निर्माण झाला होता.

शहरात सध्या पोलिसांच्या नाकाखाली ड्रग सारख्या घातक अमली पदार्थाचा, नशा निर्माण करणाऱ्या आणि अवैध धंद्यांचा मोठा बाजार सुरू असल्याचे या घटनेने पुन्हा एकदा अधोरेखित केले आहे. प्रशासनाकडून अवैध धंद्यांवर लक्ष असल्याचे दावे केले जात असले तरी, प्रत्यक्षात शहराच्या कानाकोपऱ्यात नशेच्या गोळ्या, घातक इंजेक्शन्स, एमडी पावडर आणि गांजाची सर्रास विक्री सुरू आहे. या नशेच्या आहारी गेलेले तरुण आता थेट एकमेकांच्या जीवावर उठू लागले आहेत. पोलिसांचे रूटमार्च केवळ देखावा ठरत असून शहरात छुप्या पद्धतीने अमली पदार्थ विकणाऱ्या ‘मोठ्या माशांच्या’ मुसक्या आवळण्यात यंत्रणा अपयशी ठरत असल्याची संतप्त चर्चा नागरिकांमध्ये सुरू आहे. यामागे मोठे अर्थकारण दडले असल्याने पोलिसांकडून कारवाईचा किंवा बाऊ केला जातो मात्र प्रत्यक्षात ठोस कारवाई केली जात नाही.

यामुळे सामान्य जनतेमध्ये सुरक्षिततेचा प्रश्न निर्माण झाला असून सणासुदीच्या काळात अशा प्रकारे दिवसाढवळ्या होणारे हल्ले पोलिसांच्या कार्यक्षमतेवर प्रश्नचिन्ह उभे करत आहेत. केवळ नाकाबंदी न करता नशेचा पुरवठा करणारे मुख्य सूत्रधार कोण आहेत, याचा शोध घेणे आता काळाची गरज बनली आहे. सध्या संगमनेर शहर पोलीस या प्रकरणाचा अधिक तपास करत असून आरोपींच्या शोधासाठी विविध पथके रवाना करण्यात आली असल्याची माहिती समोर येत आहे.