संगमनेर, प्रतिनिधी –
संगमनेर नगरपरिषदेच्या विशेष अर्थसंकल्पीय बैठकीत सत्ताधाऱ्यांनी प्रस्तावित केलेल्या करवाढीला शिवसेना शिंदे गटाच्या नगरसेविका साक्षी सूर्यवंशी यांनी तीव्र विरोध दर्शवला. पालिकेच्या या बैठकीत जनसामान्यांवर लादल्या जाणाऱ्या संभाव्य दरवाढीवरून जोरदार चर्चा झाली, यामध्ये सूर्यवंशी यांनी आक्रमक भूमिका घेत सर्वसामान्यांची बाजू लावून धरत या दरवाढीला तीव्र विरोध दाखविला. यासंदर्भात त्यांनी, नगराध्यक्ष, पीठासन अधिकारी आणि मुख्याधिकाऱ्यांकडे आपला लेखी विरोध सादर केला.
या अर्थसंकल्पीय बैठकीपूर्वीच शहरात मोठ्या प्रमाणावर करवाढ होणार असल्याचे संकेत मिळाले होते. संगमनेर नगरपालिकेतील एकमेव विरोधी नगरसेविका सूर्यवंशी यांच्यासह व्यापाऱ्यांनी या दरवाढीबाबत आधीच चिंता व्यक्त करत आपला विरोध नोंदवला होता. वाढत्या लोकभावनेची दखल घेत आमदार सत्यजित तांबे यांनी संबंधितांची बैठक घेऊन दिलासा देण्याचे आश्वासन दिले होते. मात्र, प्रत्यक्ष पालिका सभागृहात जेव्हा हा विषय चर्चेला आला, तेव्हा नगरसेविका साक्षी सूर्यवंशी यांनी या करवाढीला कडाडून विरोध केला.
सूर्यवंशी यांच्या तीव्र विरोधामुळे आणि जनक्षोभामुळे प्रशासनाकडून अखेर या विरोधानंतर प्रस्तावित असलेल्या अनेक दरवाढी मागे घेण्याचा निर्णय घेण्यात आला. मात्र, काही विशिष्ट क्षेत्रांवरील दरवाढ कायम ठेवण्यात आली आहे. यामध्ये शहरातील बिअर बार, वाईन शॉप आणि वैद्यकीय व्यावसायिकांचा समावेश असून, आता या व्यावसायिकांना वार्षिक २५ हजार रुपये कर मोजावा लागणार आहे. एकीकडे काही घटकांना दिलासा मिळाला असला तरी, व्यावसायिक करातील या वाढीमुळे संबंधित वर्गातून आता काय प्रतिक्रिया उमटतात, याकडे सर्वांचे लक्ष लागले आहे.
संगमनेर नगर परिषदेतील मी एकमेव विरोधी नगरसेविका आहे. सत्ताधाऱ्यांच्या चुकीच्या गोष्टींना विरोध करण्याची माझी जबाबदारी आहे. ती मी पार पाडत राहणार. प्रभागातील आणि संगमनेर करांच्या प्रश्न संदर्भात पालिकेतील माझी बांधीलकी कायम असेल. सत्ताधाऱ्यांकडून जी अन्यायकारक दरवाढ करण्यात आली ती कमी करण्यासाठी आपला प्रयत्न कायम असेल. — साक्षी सूर्यवंशी नगरसेविका.
