मुंबई:
संगमनेर शहराच्या सुनियोजित विकासाचा मार्ग प्रशस्त करण्यासाठी आणि ‘व्हिजन २.०’ ही संकल्पना अधिक प्रभावीपणे राबवण्यासाठी आमदार सत्यजीत तांबे यांच्या पुढाकाराने संगमनेर सेवा समितीच्या नगरसेवकांचा मुंबई महानगरपालिका अभ्यास दौरा सुरू आहे. शहराच्या भविष्यातील गरजा ओळखून आधुनिक नागरी सुविधा आणि प्रगत व्यवस्थापन प्रणालीचा प्रत्यक्ष अनुभव घेण्यासाठी या विशेष दौऱ्याचे आयोजन करण्यात आले आहे.
आमदार सत्यजीत तांबे यांच्या मार्गदर्शनाखाली आयोजित या दोन दिवसीय दौऱ्याच्या पहिल्या दिवशी माजी नगराध्यक्षा दुर्गाताई तांबे आणि नगराध्यक्षा डॉ. मैथिलीताई तांबे यांच्यासह संगमनेर सेवा समितीचे सर्व नगरसेवक व नगरपरिषदेच्या वरिष्ठ अधिकाऱ्यांनी बृहन्मुंबई महानगरपालिकेच्या ‘डी’ वॉर्ड कार्यालयाला भेट दिली. यावेळी प्रशासकीय कामकाजातील पारदर्शकता आणि वेगवान निर्णयांची प्रक्रिया समजून घेण्यावर भर देण्यात आला.
नगराध्यक्ष डॉ. मैथिली तांबे, माजी नगराध्यक्ष दुर्गाताई तांबे, उपनगराध्यक्ष नूरमोहम्मद शेख, आरोग्य समितीचे सभापती किशोर टोकसे यांच्यासह संगमनेर सेवा समितीच्या नगरसेवक, नगरसेविकांचा या दोन दिवसीय अभ्यास दौऱ्यामध्ये समावेश आहे.
या अभ्यासादरम्यान प्रामुख्याने नागरी सुविधा केंद्र, घनकचरा व्यवस्थापन आणि मलनिःसारण प्रकल्प या तीन महत्त्वाच्या विभागांच्या कामकाजाची सखोल पाहणी करण्यात आली. संगमनेर शहराचा विस्तार वेगाने होत असल्याने कचऱ्याची शास्त्रोक्त विल्हेवाट लावणे आणि सांडपाण्यावर प्रक्रिया करून त्याचा पुनर्वापर करणे या आघाड्यांवर मुंबईचे मॉडेल कसे राबवता येईल, याचा तांत्रिक अभ्यास यावेळी करण्यात आला. तसेच नागरिकांना सर्व शासकीय सेवा एकाच छताखाली उपलब्ध करून देणाऱ्या ‘नागरी सुविधा केंद्रा’च्या कार्यपद्धतीची नगरसेवकांनी प्रत्यक्ष माहिती घेतली.
आमदार सत्यजीत तांबे यांच्या कल्पनेतून साकारलेल्या या अभ्यास दौऱ्यामुळे संगमनेरच्या भावी विकासकामांना एक नवी दिशा मिळणार आहे. दौऱ्याच्या दुसऱ्या दिवशीही इतर महत्त्वाच्या विभागांना भेटी दिल्या जाणार असून, या अनुभवातून संगमनेरमध्ये अधिक सक्षम, लोकाभिमुख आणि अत्याधुनिक प्रशासन राबवण्याचा संकल्प यावेळी व्यक्त करण्यात आला.
