संगमनेर शहरात पोलिसांची कारवाई; मोठ्या प्रमाणात गांजासह दोघांना अटक

संगमनेर, प्रतिनिधी –
शहर पोलिसांनी अमली पदार्थ तस्करीविरोधात मोठी कारवाई करत सुकेवाडी-समनापूर रोड परिसरातून तब्बल १० लाख ९४ हजार ७०० रुपये किमतीचा मुद्देमाल जप्त केला आहे. या कारवाईत पोलिसांनी २१ किलो ४९० ग्रॅम वजनाचा गांजा आणि एक स्विफ्ट डिझायर कार हस्तगत केली असून, दोन आरोपींना बेड्या ठोकल्या आहेत.
मिळालेल्या माहितीनुसार, १ मार्च २०२६ रोजी रात्री आठ ते दहाच्या दरम्यान सुकेवाडी येथील समनापूर रोड परिसरात ही कारवाई करण्यात आली. पोलीस कॉन्स्टेबल विजय अण्णा खुळे यांनी याप्रकरणी फिर्याद दिली आहे. अटक करण्यात आलेल्या आरोपींमध्ये प्रथमेश उर्फ भैय्या पोपट राऊत (वय २६, रा. घुलेवाडी, संगमनेर) आणि प्रथमेश सुरेश गोलवड (वय २१, रा. शिर्डी, ता. राहाता) यांचा समावेश आहे. यातील आरोपी प्रथमेश राऊत हा पोलीस अभिलेखावरील सराईत गुन्हेगार असल्याचे समोर आले आहे. तसेच नासिक, संगमनेर पोलिसांकडे दाखल असलेल्या गुन्ह्यांमध्ये तो पोलिसांना गुंगारा देत होता.
पोलिसांनी दिलेल्या माहितीनुसार, जप्त करण्यात आलेल्या मुद्देमालात ६ लाख ४४ हजार ७०० रुपये किमतीचा २१ किलो ४९० ग्रॅम गांजा, यामध्ये पाने, फुले, काड्या आणि बियांचा समावेश आहे, तसेच ४ लाख ५० हजार रुपये किमतीची पांढऱ्या रंगाची स्विफ्ट डिझायर कार (क्रमांक MH-04-DR-7802) आणि रिकामी प्लास्टिक पाकिटे असा एकूण ११ लाखांचा ऐवज आहे. आरोपींकडे मानवी मेंदूवर परिणाम करणारा उग्र वासाचा अमली पदार्थ मिळून आल्याने त्यांच्यावर संगमनेर शहर पोलीस ठाण्यात गुन्हा रजिस्टर नंबर १८१/२०२६ नुसार अमली औषधे द्रव्य व मन प्रभावी पदार्थ अधिनियम १९८५ (NDPS Act) च्या कलम ८(क), २२(ब) आणि २०(ब) नुसार गुन्हा दाखल करण्यात आला आहे.
या कारवाईच्या वेळी उपविभागीय पोलीस अधिकारी डॉ. कुणाल सोनवणे, पोलीस निरीक्षक समीर बारवकर आणि पोलीस उपनिरीक्षक श्रीकांत सावंत यांनी घटनास्थळी भेट दिली. या प्रकरणाचा पुढील तपास पोलीस उपनिरीक्षक श्रीकांत सावंत करत असून, दोन्ही आरोपींना अटक करण्यात आली आहे.