लोकप्रतिनिधींनी कायद्याचे ज्ञान आत्मसात केल्यास जनतेचे प्रश्न अधिक प्रभावीपणे मांडता येतील : नगराध्यक्षा डॉ. मैथिली तांबे

संगमनेर, प्रतिनिधी –
स्थानिक स्वराज्य संस्थांचे कामकाज अधिक प्रभावी, जबाबदार आणि कायदेशीर चौकटीत राबवण्यासाठी लोकप्रतिनिधींनी कायद्याचा सखोल अभ्यास करणे आवश्यक असल्याचे प्रतिपादन संगमनेरच्या लोकनियुक्त नगराध्यक्षा डॉ. मैथिली तांबे यांनी केले.
संगमनेर नगरपरिषद आणि प्रजा फाउंडेशन यांच्या संयुक्त विद्यमाने आयोजित करण्यात आलेल्या विशेष कार्यशाळेत त्या बोलत होत्या. नगरपालिकेचे बजेट आणि नियोजनाच्या अनुषंगाने या महत्त्वपूर्ण कार्यशाळेचे आयोजन करण्यात आले होते.
या कार्यशाळेत प्रामुख्याने ‘महाराष्ट्र नगरपरिषदा, नगरपंचायती आणि औद्योगिक नगरी अधिनियम, १९६५’ या कायद्याचा सखोल अभ्यास, नगरसेवकांची कर्तव्ये आणि विविध विषय समित्यांचे महत्त्व यावर तज्ज्ञांनी सविस्तर मार्गदर्शन केले. सभागृहातील कामकाजाची नेमकी पद्धत आणि लोकशाहीतील लोकप्रतिनिधींची भूमिका यावर प्रजा फाउंडेशनच्या तज्ञांच्या टीमने नगरसेवकांना मार्गदर्शन केले.
डॉ. मैथिली तांबे यांनी म्हणाल्या, लोकप्रतिनिधींना कायद्याचे ज्ञान असल्यास प्रशासकीय कामकाजात पारदर्शकता येते. बजेटचे सूक्ष्म नियोजन, उपलब्ध निधीचा कार्यक्षम विनियोग आणि विकासकामांमध्ये सर्वसामान्य जनतेचा सहभाग वाढवण्यासाठी अशा प्रकारच्या कार्यशाळा मैलाचा दगड ठरतात. या प्रशिक्षणातून नगरसेवकांना प्रश्न विचारण्याचे कौशल्य आणि कायद्याचा अचूक अर्थ लावण्याचे व्यावहारिक प्रशिक्षण मिळाले आहे.
या उपक्रमात शहरातील सर्व नगरसेवकांनी उत्स्फूर्त सहभाग नोंदवला. जनतेचे प्रश्न सभागृहात मांडण्याची योग्य पद्धत आणि तांत्रिक बाबींचे ज्ञान मिळाल्यामुळे आगामी काळात संगमनेर शहरातील विकासकामे अधिक परिणामकारक आणि गतीने पूर्ण होतील, असा विश्वास यावेळी व्यक्त करण्यात आला.