रोटरी क्लब संगमनेरतर्फे संग्राम निवासी मूकबधिर विद्यालयात ‘रंग बरसे रंगोत्सव’

संगमनेर, प्रतिनिधी-
रोटरी क्लब संगमनेर आणि दीपक इंडस्ट्रीज यांच्या संयुक्त विद्यमाने संग्राम निवासी मूकबधिर विद्यालयात दिव्यांग विद्यार्थ्यांसोबत “रंग बरसे रंगोत्सव” मोठ्या उत्साहात साजरा करण्यात आला. या उपक्रमामुळे विद्यार्थ्यांमध्ये आनंदाचे आणि उत्साहाचे वातावरण निर्माण झाले.
दि. ९ मार्च २०२६ रोजी आयोजित करण्यात आलेल्या या कार्यक्रमात विद्यालयातील दिव्यांग विद्यार्थ्यांसोबत रोटरी क्लबच्या सदस्यांनी रंग खेळत आनंद वाटण्याचा अनोखा आणि भावनिक क्षण अनुभवला. रंगांच्या उधळणीत विद्यार्थ्यांचे चेहरे आनंदाने उजळून निघाले आणि संपूर्ण परिसरात उत्साहाचे वातावरण निर्माण झाले.
कार्यक्रमादरम्यान पवनकुमार वर्मा यांनी विद्यार्थ्यांसाठी आणलेल्या ताज्या सफरचंदांसह विविध फळाहाराचा विद्यार्थ्यांनी मनसोक्त आस्वाद घेतला.
या कार्यक्रमाचे विशेष आकर्षण म्हणजे रोटेरियन दीपकजी मणियार (दीपक इंडस्ट्रीज) यांच्या सौजन्याने विद्यार्थ्यांसाठी उपलब्ध करून देण्यात आलेले विविध रंगांचे अत्याधुनिक स्प्रे होते. या स्प्रेच्या माध्यमातून विद्यार्थ्यांनी रंगोत्सव अधिक उत्साहात साजरा केला. विद्यार्थ्यांसोबत शिक्षक आणि रोटरी क्लबचे सदस्यही या रंगोत्सवात सहभागी होत सर्वांनी मिळून आनंदाचा अविस्मरणीय क्षण अनुभवला.
यावेळी रोटरी क्लब संगमनेरचे अध्यक्ष विश्वनाथ मालाणी, सचिव सौरभ म्हाळस, प्रकल्प प्रमुख राजेंद्र खोसे तसेच क्लब संचालक पवनकुमार वर्मा, आनंद हासे, संदीप फटांगरे, भारतभूषण नावंदर, अमित पवार, अजित काकडे, मधुसूदन करवा आदी रोटरी क्लब सदस्य उपस्थित होते.
या दिव्यांग विद्यार्थ्यांसोबत पुढील वर्षी आणखी मोठ्या आणि अधिक उत्साहपूर्ण स्वरूपात रंगोत्सव साजरा करण्याचा संकल्प यावेळी रोटरी क्लब सदस्यांनी व्यक्त केला.