अदृश्य शक्तीसमोर आम्ही हतबल, दादा आम्हाला माफ करा; आमदार अमोल मिटकरींची भावूक पोस्ट चर्चेत

मुंबई, विशेष प्रतिनिधी –
राष्ट्रवादी काँग्रेसचे आक्रमक आमदार अमोल मिटकरी यांनी सोशल मीडियावर केलेली एक पोस्ट सध्या राजकीय वर्तुळात प्रचंड चर्चेचा विषय ठरत आहे. आपल्या भावनांना वाट करून देताना त्यांनी थेट उपमुख्यमंत्री अजित पवार यांची माफी मागितली असून, सध्याच्या राजकीय परिस्थितीवर अत्यंत हतबलतेने भाष्य केले आहे. सामान्यांच्या संसाराला आणि सर्वसामान्यांना न्याय मिळवून देणारे व्यक्तिमत्व म्हणून अजित पवारांचा उल्लेख करताना, आज दुर्दैवाने त्यांनाच न्याय मिळत नसल्याची खंत मिटकरी यांनी व्यक्त केली आहे.
या पोस्टमध्ये मिटकरी यांनी अत्यंत गंभीर विधान करताना एका ‘अदृश्य शक्ती’चा उल्लेख केला आहे. जर अशीच घटना इतर कोणासोबत घडली असती आणि अजित पवार पूर्ण ताकदीनिशी मैदानात असते, तर त्यांनी सर्वांना ताळ्यावर आणले असते आणि योग्य न्यायनिवाडा केला असता, असा विश्वास त्यांनी व्यक्त केला. मात्र, सध्याच्या परिस्थितीत ही अदृश्य शक्ती ओळखता येत नसल्यामुळे आपण काहीही करू शकत नसल्याची हतबलता त्यांनी बोलून दाखवली आहे.
‘आता आवाज काढावा इतकाही आवाज शिल्लक नाही’ असे म्हणत त्यांनी स्वतःला ‘कपाळकरंटे’ संबोधले आहे. ही पोस्ट नेमकी कोणत्या संदर्भात आहे किंवा त्यांचा रोख कोणाकडे आहे, याबाबत आता राजकीय तर्कवितर्क लढवले जात आहेत. अजित पवारांच्या समर्थकांमध्ये या पोस्टमुळे चिंतेचे वातावरण असून, सत्तेच्या राजकारणात नक्की काय शिजतंय, अशी चर्चा आता रंगू लागली आहे.