ठाकरे गटाच्या ६ गद्दार खासदारांचे दिल्लीत लोटांगण; अखेर शिंदेशाहीत विलीन होणार! गद्दारांच्या यादीत शिर्डीचे खासदार!

नवी दिल्ली:
महाराष्ट्र आणि निष्ठावंत शिवसैनिकांशी गद्दारी करणाऱ्या ठाकरे गटाच्या ६ खासदारांनी अखेर दिल्लीत लोटांगण घातले आहे. यात शिर्डीचे खासदार भाऊसाहेब वाकचौरे यांचाही समावेश असून, त्यांनी आपल्या दिल्लीश्वरांच्या इशाऱ्यावर शिवसेना उद्धव बाळासाहेब ठाकरे पक्षाची साथ सोडली असल्याची माहिती समोर येत आहे.
लोकसभा निवडणुकीत शिवसेना उद्धव बाळासाहेब ठाकरे पक्षाकडून निवडून आलेल्या या फुटीर खासदारांनी काल रात्रीपासूनच दिल्ली गाठून लोकसभा अध्यक्ष ओमप्रकाश बिर्ला यांची भेट घेतली आणि स्वतंत्र गट स्थापन करत असल्याचे पत्र सादर केले. लोकसभा अध्यक्षांनी या गटाला तात्काळ मंजुरी दिली असून, आता हा गट एकनाथ शिंदे यांच्या शिवसेनेत विलीन होणार असल्याचे खात्रीलायक सूत्रांकडून समजते.
काल रात्रीपासूनच ठाकरे गटाशी प्रतारणा करणारे हे फुटीर खासदार छुप्या मार्गाने एकापाठोपाठ एक दिल्लीत दाखल होत होते. महाराष्ट्राचे उपमुख्यमंत्री एकनाथ शिंदे हे स्वतः या गद्दारीच्या ऑपरेशनचे नेतृत्व करण्यासाठी आधीच दिल्लीत तळ ठोकून होते. दिल्लीत पोहोचताच या बंडखोर खासदारांना अज्ञातस्थळी डांबून ठेवण्यात आले होते.
त्यानंतर आज सर्व ६ खासदारांनी शिंदेंच्या उपस्थितीत लोकसभा अध्यक्षांसमोर हजेरी लावली आणि त्यांच्या देखतच पत्रावर स्वाक्षऱ्या केल्या. पक्षांतरबंदी कायद्यानुसार दोन तृतीयांश संख्याबळाची गरज असल्याने, ठाकरे गटाच्या ९ खासदारांपैकी ६ जणांनी एकत्र येत हा कायदेशीर पळपुटेपणा केला आहे.
महाराष्ट्रात ‘ऑपरेशन टायगर’ नावाने चाललेल्या या पडद्यामागच्या खेळीला आधी दिल्लीतील भाजपश्रेष्ठींनी हिरवा कंदील दिला नव्हता. मात्र, १० जून रोजी दिल्लीत पार पडलेल्या एनडीएच्या बैठकीनंतर केंद्रीय गृहमंत्री अमित शाह आणि पंतप्रधान मोदी यांच्यात खलबते झाली आणि या गद्दारीच्या नव्या अंकाला ग्रीन सिग्नल मिळाला. शिवसेना खासदार फोडण्याच्या या नाट्याला ऑपरेशन टायगर नाव देण्यात आले होते तर खासदार फुटी नंतर त्यांना आता ठाकरेंच्या शिवसैनिकांकडून गद्दार संबोधले जात आहे.
त्यानंतर दिल्लीतील पंचतारांकित हॉटेलमध्ये या खासदारांच्या बैठका झाल्या. ठाकरे शिवसेनेशी गद्दारी करणाऱ्यांच्या या यादीत संजय जाधव, संजय देशमुख, नागेश पाटील आष्टीकर, ओमराजे निंबाळकर, मुंबईचे संजय दिना पाटील आणि मुख्यत्वे शिर्डीचे खासदार भाऊसाहेब वाकचौरे यांचा समावेश आहे.