संगमनेरमध्ये उबाठा गटाच्या पदाधिकारी, शिवसैनिकांकडून गद्दारी करणाऱ्या खासदार वाकचौरे विरोधात आंदोलन; ७ जणांसह इतर आंदोलकांवर गुन्हा

महाराष्ट्र संवाद न्यूज ऑनलाईन
संगमनेर:
शिवसेना ठाकरे गटाचे शिर्डीचे खासदार भाऊसाहेब वाकचौरे यांनी पक्षाशी, पक्षप्रमुख उद्धव ठाकरे यांच्याशी गद्दारी केली. याचा निषेध नोंदविणाऱ्या ठाकरेंच्या शिवसैनिक पदाधिकारी, कार्यकर्त्यांविरोधात संगमनेर शहर पोलिसांनी गुन्हा दाखल केला आहे. पोलिसांच्या या कृतीमुळे इतर आंदोलकांना सवलत आणि काहींवर गुन्हा, या प्रकाराबद्दल शिवसैनिकांमध्ये संतापाचे वातावरण निर्माण झाले आहे.
संगमनेर येथील बसस्थानकासमोरील जुना पुणे-नाशिक महामार्गावर उबाठा (उद्धव बाळासाहेब ठाकरे) शिवसेना गटाच्या कार्यकर्त्यांनी बेकायदेशीर रस्ता रोको, आंदोलन केल्याप्रकरणी संगमनेर शहर पोलीस ठाण्यात गुन्हा दाखल करण्यात आला आहे. खासदार भाऊसाहेब वाकचौरे यांच्या विरोधात करण्यात आलेल्या विधानांचा आणि प्रतिमेचे विटंबन केल्याचा निषेध नोंदवण्यासाठी हे आंदोलन करण्यात आले होते. याप्रकरणी पोलिसांनी ७ निष्पन्न आरोपींसह इतर ५ ते १० आंदोलकांचा गुन्हा दाखल झालेल्या मध्ये समावेश आहे.
मिळालेल्या माहितीनुसार, बुधवारी (१७ जून) दुपारी ४:३० वाजेच्या सुमारास संगमनेर बसस्थानकासमोरील जुन्या पुणे-नाशिक महामार्गावर आंदोलकांनी एकत्र येत खासदार भाऊसाहेब वाकचौरे यांच्या प्रतिकात्मक पुतळ्यास साडी नेसवून पुतळा पेटवून दिला. तसेच त्यांच्या विरोधात घोषणाबाजी करत निषेध व्यक्त केला. या आंदोलनामुळे महामार्गावरील वाहतुकीला अडथळा निर्माण झाला आणि सार्वजनिक शांतता भंग पावली. घटनास्थळी उपस्थित पोलीस अधिकारी आणि कर्मचाऱ्यांनी आंदोलकांना रस्त्यावरून बाजूला सारून परिस्थिती नियंत्रणात आणली.
या बेकायदेशीर कृत्याबद्दल पोलीस हवालदार संजय बढे यांनी दिलेल्या फिर्यादीवरून संगमनेर शहर पोलीस ठाण्यात गुन्हा रजिस्टर क्रमांक ६०२/२०२६ नुसार भारतीय न्याय संहिता (BNS) २०२३ चे कलम २२३ सह महाराष्ट्र पोलीस अधिनियम कलम ३७(१)(३), १३५ प्रमाणे गुन्हा दाखल करण्यात आला आहे. यामध्ये शिवसेना उपजिल्हाप्रमुख अमर कन्हैयालाल कतारी, शहर प्रमुख अमित रामकिसन चव्हाण व फैसल सय्यद, भीमाशंकर पावसे, अमोल डुकरे, आसिफ तांबोळी आणि त्रिलोक कन्हैयालाल कतारी यांच्यासह अन्य आंदोलकांचा समावेश आहे. या प्रकरणाचा पुढील तपास महिला पोलीस हेड कॉन्स्टेबल दहातोंडे करत आहेत.