गैरवर्तन भोवलं; संगमनेरच्या ‘या’ माजी पंचायत समिती सदस्याची ठाकरे शिवसेनेतून हकालपट्टी

शिर्डी, विशेष प्रतिनिधी-
साधु-संतांचा अपमान केल्याच्या कारणावरून शिवसेना (उद्धव बाळासाहेब ठाकरे) पक्षाने शिस्तभंगाची कठोर कारवाई करत संगमनेर मधील माजी पंचायत समिती सदस्य अशोक सातपुते यांची पक्षातून तडकाफडकी हकालपट्टी केली आहे.
नाथ संप्रदायाचे श्रद्धास्थान असलेल्या अवघडपीर सतनाथजी महाराज (चितेगाव, नाशिक) यांच्याबद्दल आक्षेपार्ह वक्तव्य करणे शिवसेनेचे माजी पदाधिकारी अशोक सातपुते यांना चांगलेच महागात पडले आहे.
या प्रकरणाची सविस्तर माहिती अशी की, अशोक सातपुते यांनी सतनाथजी महाराज यांच्याबद्दल अपशब्द वापरून त्यांचा अवमान केल्याचा व्हिडिओ समोर आला होता. ही बाब निदर्शनास येताच भाविक आणि शिवसैनिकांमध्ये तीव्र संतापाची लाट उसळली. या घटनेचे गांभीर्य ओळखून जिल्हाप्रमुख सचिन कोते पाटील यांनी तत्काळ शिवसेना सचिव व माजी खासदार विनायक राऊत साहेब यांची भेट घेतली. कोते पाटील यांनी घडलेली सर्व हकीकत सांगून त्यासंदर्भातील ठोस व्हिडिओ पुरावे विनायक राऊत यांच्याकडे सादर केले.
सादर करण्यात आलेले सर्व पुरावे पाहिल्यानंतर आणि घटनेची शहानिशा केल्यानंतर, शिवसेना सचिव विनायक राऊत यांनी पक्षप्रमुख उद्धव ठाकरे यांच्या आदेशानुसार अशोक सातपुते यांची पक्षातून हकालपट्टी करण्याचा निर्णय जाहीर केला. हिंदुहृदयसम्राट शिवसेनाप्रमुख बाळासाहेब ठाकरे आणि पक्षप्रमुख उद्धवजी ठाकरे यांनी शिवसैनिकांना नेहमीच हिंदुत्वाचा विचार आणि देव, देश, धर्माच्या आड येणाऱ्या विघातक शक्तींशी लढण्याचे संस्कार दिले आहेत. शिवसेना नेहमीच साधु-संतांचा आदर करत आली असून, भविष्यातही अशा चुकीच्या गोष्टींचे समर्थन पक्ष कधीही करणार नाही, असा स्पष्ट संदेश या कारवाईतून देण्यात आला आहे.