संगमनेर, प्रतिनिधी-
वडगाव पान (संगमनेर) येथील एका तेरा वर्षीय शालेय मुलीवर अज्ञात इसमाने केलेल्या निर्घृण ॲसिड हल्ल्याच्या घटनेने संपूर्ण तालुका हादरला आहे. या घटनेचा माजी महसूलमंत्री बाळासाहेब थोरात यांनी तीव्र शब्दांत निषेध केला असून, माजी आमदार डॉ. सुधीर तांबे यांनी पीडित मुलीची भेट घेऊन प्रकृतीची विचारपूस केली आहे. गुन्हेगाराला तातडीने शोधून त्याच्यावर कठोर कारवाई करावी, अशी मागणी पोलीस प्रशासनाकडे करण्यात आली आहे.
पुरोगामी महाराष्ट्राला काळिमा फासणारी घटना- या घटनेबाबत प्रतिक्रिया देताना बाळासाहेब थोरात म्हणाले की, शालेय विद्यार्थिनीवर झालेला हा हल्ला अत्यंत दुर्दैवी आणि माणुसकीला काळिमा फासणारा आहे. गुन्हेगार हा कोणत्याही जाती-धर्माचा नसून तो केवळ गुन्हेगार असतो. अशा विकृत मानसिकतेच्या व्यक्तीला पोलीस प्रशासनाने तात्काळ जेरबंद करून त्याला कठोरातील कठोर शिक्षा मिळवून दिली पाहिजे.
डॉ. तांबे यांनी घेतली पीडितेची भेट- माजी आमदार डॉ. सुधीर तांबे यांनी लोणी येथील प्रवरा रुग्णालयात जाऊन जखमी मुलीची भेट घेतली आणि तिच्या कुटुंबाला धीर दिला. यावेळी त्यांनी उपविभागीय पोलीस अधिकारी डॉ. कुणाल सोनवणे यांच्याशी दूरध्वनीवरून संपर्क साधून तपासाचा आढावा घेतला. छत्रपती शिवाजी महाराज आणि सावित्रीबाई फुलेंच्या महाराष्ट्रात अशा घटना घडणे निंदनीय आहे. महिला आणि मुलींच्या सुरक्षिततेसाठी समाजाने जागृत राहणे आवश्यक असून, शाळा परिसर व सार्वजनिक ठिकाणी सीसीटीव्ही कॅमेरे बसवणे आता काळाची गरज बनली आहे, असे मत डॉ. तांबे यांनी व्यक्त केले.
उपचारांचा सर्व खर्च ‘एसएमबीटी’ उचलणार- या संकटकाळात पीडित कुटुंबाला मोठा आर्थिक आधार मिळाला आहे. जखमी मुलीवर होणाऱ्या सर्व उपचारांचा खर्च एसएमबीटी सेवाभावी ट्रस्टच्या वतीने करण्यात येणार असल्याचे डॉ. सुधीर तांबे यांनी म्हटले आहे. रुग्णालयातील डॉक्टरांशी चर्चा करून तिला सर्वोत्तम वैद्यकीय सुविधा पुरवण्याच्या सूचनाही त्यांनी दिल्या आहेत.
या घटनेमुळे परिसरात संतापाची लाट असून, पोलीस प्रशासन आता आरोपीच्या मुसक्या कधी आवळते, याकडे सर्वांचे लक्ष लागले आहे.
