जाती-धर्माच्या पलीकडे जाऊन माणुसकीचे दर्शन! रमजान ईदनिमित्त मुस्लिम बांधवांकडून ॲसिड हल्ल्यातील पीडितेला आधार

संगमनेर | मोहसीन शेख 
तालुक्यातील वडगाव पान येथे तीन दिवसांपूर्वी एका बारा वर्षीय शाळकरी मुलीवर झालेल्या अमानुष ॲसिड हल्ल्याच्या घटनेने संपूर्ण महाराष्ट्र हादरला असून सर्वत्र संतापाची लाट उसळली आहे. या घटनेचा विविध स्तरांतून तीव्र निषेध केला जात असतानाच, संगमनेर शहरातील मुस्लिम समाजाने रमजान ईदच्या निमित्ताने माणुसकीचे दर्शन घडवले आहे. मुस्लिम बांधवांनी आज पीडित मुलीच्या निवासस्थानी जाऊन तिच्या कुटुंबीयांची भेट घेतली आणि त्यांना मदतीचा हात दिला.
काही दिवसांपूर्वी घडलेल्या या घटनेमुळे पीडित कुटुंब सध्या मोठ्या मानसिक धक्क्यात आहे. अशा कठीण काळात त्यांना धीर देण्यासाठी संगमनेर शहरातील विविध क्षेत्रांतील मान्यवरांनी पुढाकार घेतला. ईदचा सण असतानाही त्याचे औचित्य साधत मुस्लिम समाजातील प्रतिनिधींनी पीडित कुटुंबाची विचारपूस केली. या संकटकाळात तुम्ही एकटे नसून संपूर्ण समाज तुमच्या पाठीशी खंबीरपणे उभा आहे, असा विश्वास यावेळी देण्यात आला. केवळ सांत्वन न थांबता, मुस्लिम समाजाच्या वतीने पीडित कुटुंबाला मोठी आर्थिक मदतही सुपूर्द करण्यात आली.
यावेळी भावना व्यक्त करताना मुस्लिम समाजाच्या प्रतिनिधींनी सांगितले की, एका निष्पाप मुलीवर झालेला हा हल्ला अत्यंत निंदनीय आणि माणुसकीला काळीमा फासणारा आहे. अशा विकृत मानसिकतेच्या गुन्हेगाराला कायद्याने कठोर शिक्षा दिलीच पाहिजे, जेणेकरून भविष्यात अशा घटनांची पुनरावृत्ती होणार नाही. पीडित कुटुंबाला न्याय मिळवून देण्यासाठी आणि त्यांना या संकटातून सावरण्यासाठी एकत्र येणे ही आपली सामाजिक जबाबदारी असल्याचेही त्यांनी नमूद केले.
याप्रसंगी संगमनेर शहरातील मुस्लिम समाजातील विद्यमान व माजी नगरसेवक, विविध सामाजिक संघटनांचे पदाधिकारी आणि कार्यकर्ते मोठ्या संख्येने उपस्थित होते. दरम्यान, जखमी मुलीवर सध्या रुग्णालयात उपचार सुरू असून तिची प्रकृती आता स्थिर असल्याची माहिती आहे.