संगमनेरमध्ये बीएलओंच्या मनमानी कारभारावर ‘ह्यूमन इनोवेशन’ आक्रमक; घरोघरी जाऊन काम करण्याच्या मागणीसाठी प्रशासनाला निवेदन

संगमनेर, प्रतिनिधी-

निवडणूक आयोगाच्या ‘सिस्टिमॅटिक इंटेन्सिव्ह रिव्हिजन’ (SIR) मोहिमेअंतर्गत मतदार यादी अद्ययावत करण्याचे काम सुरू असताना, शहरातील काही बीएलओनी घरोघरी न जाता नागरिकांना कार्यालयात बोलावून मनमानी कारभार सुरू केला असल्याचा आरोप ‘ह्यूमन इनोवेशन ऑर्गनायझेशन’ने केला आहे. या गंभीर प्रकाराची दखल घेत संघटनेच्या पदाधिकाऱ्यांनी आणि स्थानिक नागरिकांनी संगमनेरचे प्रांत अधिकारी व मुख्याधिकाऱ्यांना लेखी निवेदन देऊन संबंधित कर्मचाऱ्यांवर कडक कारवाईची मागणी केली आहे.

निवडणूक आयोगाच्या नियमांनुसार बीएलओ यांनी प्रत्यक्ष घराघरांत जाऊन पडताळणी करणे बंधनकारक आहे. मात्र, संगमनेरमध्ये अनेक बीएलओ दूरध्वनीवरून नागरिकांना थेट नगरपालिकेत किंवा ठराविक ठिकाणी बोलावून घेत आहेत. या प्रकारामुळे विशेषतः ज्येष्ठ नागरिक आणि महिलांची मोठी गैरसोय होत आहे. योग्य जनजागृतीच्या अभावामुळे अनेक नागरिक या महत्त्वाच्या प्रक्रियेपासून वंचित राहण्याची भीती निर्माण झाली असून, या कामासाठी मुदतवाढ देण्याची मागणीही निवेदनात करण्यात आली आहे.

पालिकेतील अधिकाऱ्यांना भेटलेल्या संघटनेच्या शिष्टमंडळामध्ये शौकत पठाण, जमिर शेख, रफिक सौदागर व युसुफ शेख यांच्यासह संघटनेचे पदाधिकारी आणि नागरिकांचा सहभाग होता.

या प्रकरणावर भूमिका मांडताना प्रशासनाने कामाचा ताण असल्याचे मान्य केले असले तरी, नागरिकांनी घाबरू नये असे आवाहन केले आहे. सध्या नगरपालिकेची थकबाकी वसुली आणि SIR मोहीम अशी दोन्ही कामे एकाच वेळी सुरू असल्याने कर्मचाऱ्यांवर कामाचा अतिरिक्त भार आहे. मात्र, ही प्रक्रिया निरंतर सुरू असून, तिचा हा केवळ पहिलाच टप्पा असल्याचे प्रशासनाने स्पष्ट केले आहे.

याबाबत अधिक माहिती देताना मुख्याधिकारी म्हणाले की, बीएलओ यांनी प्रत्यक्ष घरोघरी जाऊनच काम करणे अपेक्षित आहे. नागरिकांनी कोणत्याही अफवेला बळी पडू नये. ही प्रक्रिया मार्चनंतर दुसऱ्या टप्प्यातही सुरू राहणार असल्याने कुणाचेही नाव मतदार यादीतून सुटणार नाही. बीएलओ लवकरच घरोघरी येऊन माहिती संकलित करतील, त्यामुळे नागरिकांनी प्रशासनाला सहकार्य करावे.