महाराष्ट्र संवाद न्यूज ऑनलाईन, संगमनेर
संगमनेर तालुक्यातील एका दुर्दैवी ॲसिड हल्ला प्रकरणातील पीडित मुलगी आणि तिच्या कुटुंबियांना आधार देण्यासाठी महिला व बालकल्याण मंत्री आदिती तटकरे विशेष दौऱ्यावर येत आहेत. मंत्री तटकरे यांनी आपला नियोजित विदर्भ दौरा रद्द करून रविवारी थेट लोणी (ता. राहाता) येथील रुग्णालयात पोहोचण्याचा निर्णय घेतला आहे.
पीडितेच्या भेटीला प्राधान्य
मंत्री तटकरे आज शनिवारी या पिडीत मुलीची व मुलीच्या कुटुंबीयांची भेट घेण्यासाठी येणार होत्या. मात्र त्यांचा शनिवारचा दौरा अचानक रद्द झाला होता. संगमनेरमधील ॲसिड हल्ला प्रकरणाचे गांभीर्य लक्षात घेता आणि पीडित मुलीला मानसिक बळ देण्याच्या उद्देशाने त्यांनी तातडीने आपला दौरा बदलला आहे. पीडित मुलगी सध्या लोणी येथील हॉस्पिटलमध्ये उपचार घेत असून, मंत्री तटकरे तिथे जाऊन तिची विचारपूस करणार आहेत. या भेटीदरम्यान त्या पीडितेच्या कुटुंबियांशी संवाद साधून त्यांना सरकारकडून सर्वतोपरी मदतीचे आश्वासन देण्याची शक्यता आहे.
असा असेल दौरा
मंत्री तटकरे या रविवारी सकाळी सुतारवाडी तालुका रोहा येथून वाहनाने सायंकाळी साडेचार वाजेपर्यंत लोणी येथे येत आहे. पीडित मुलीची व तिच्या कुटुंबीयांची भेट घेतल्यानंतर त्या पुन्हा संगमनेर मार्गे पुणे येथे जाणार आहे.
प्रशासनात खळबळ
मंत्री तटकरे केवळ या एका मुलीच्या भेटीसाठी विशेष दौरे करत असल्याने प्रशासकीय वर्तुळातही या भेटीची मोठी चर्चा आहे. महिलांवरील अन्यायाच्या घटनांबाबत शासन अत्यंत गंभीर असल्याचे यातून दिसून येत आहे. या भेटीच्या पार्श्वभूमीवर रुग्णालय प्रशासन आणि स्थानिक यंत्रणेची तयारी सुरू झाली आहे.
न्यायाची अपेक्षा
या घटनेनंतर परिसरात संतापाची लाट पसरली असून, आरोपींवर कठोर कारवाई करण्याची मागणी जोर धरत आहे. अद्याप आरोपीचा कोणताही सुगावा पोलीस यंत्रणेला लागत नसल्याने पोलीस तपासावर प्रश्नचिन्ह निर्माण झाले आहे. या पार्श्वभूमीवर मंत्री तटकरे यांच्या या भेटीमुळे पीडितेच्या कुटुंबियांना मोठा आधार मिळणार असून, त्यांना न्याय मिळवून देण्यासाठी प्रशासकीय पातळीवर वेगवान हालचाली होण्याची अपेक्षा व्यक्त केली जात आहे.
