खंडोबा देवस्थान ‘क’ वर्ग दर्जासाठी प्रयत्नशील: आमदार अमोल खताळ

महाराष्ट्र संवाद न्यूज ऑनलाईन, संगमनेर
संगमनेर तालुक्यातील पठार भागातील सावरगाव घुले येथील खंडोबा देवस्थान हे परिसरातील भाविकांचे प्रमुख श्रद्धास्थान आहे. या देवस्थानाचा ‘क’ वर्गात समावेश होणे अत्यंत आवश्यक असून, आगामी जिल्हा नियोजन समितीच्या बैठकीत या विषयाचा तीव्रतेने पाठपुरावा केला जाईल, असा विश्वास आमदार अमोल खताळ यांनी सावरगाव घुले येथील ग्रामस्थांना दिला.
सावरगाव घुले येथे आयोजित खंडोबा देवस्थानच्या यात्रोत्सवानिमित्त आमदार अमोल खताळ यांनी उपस्थित राहून महाआरती केली. या कार्यक्रमात आमदार खताळ यांच्या हस्ते बैलगाडा शर्यतीत यश मिळविल्याबद्दल मधुकर घुले यांचा सन्मानचिन्ह व श्रीफळ देऊन सत्कार करण्यात आला.
याप्रसंगी ग्रामस्थांशी संवाद साधताना ते म्हणाले की, या देवस्थानाचा ‘क’ वर्गात समावेश यापूर्वीच व्हायला हवा होता, परंतु वन विभागाच्या तांत्रिक अडचणींमुळे हा प्रस्ताव प्रलंबित राहिला. आता या सर्व तांत्रिक अडचणी दूर करून, संबंधित विभागांशी समन्वय साधून देवस्थानाला लवकरात लवकर ‘क’ वर्गाचा दर्जा मिळवून देण्यासाठी आपण प्राधान्याने प्रयत्न करणार आहोत.
याप्रसंगी देवस्थानचे अध्यक्ष सिताराम घुले, सचिव गोरक्षनाथ मदने, राष्ट्रवादी काँग्रेसचे (शरदचंद्र पवार गट) तालुकाध्यक्ष चंद्रकांत घुले, उपसरपंच नामदेव घुले, व्यापारी अमित राठी, सोसायटीचे अध्यक्ष संतोष घुले, भानुदास बोराडे, पत्रकार बाबासाहेब कडू, शरद घुले, सचिन घुले, बाळासाहेब घुले, बन्सी मदने यांच्यासह ग्रामस्थ मोठ्या संख्येने उपस्थित होते.
आमदार खताळ पुढे म्हणाले की, अकलापूर आणि सावरगाव घुले या भागात बैलगाडा शर्यतीची परंपरा सर्वप्रथम सुरू झाली आणि ती आजवर जतन केली जात आहे, ही खरोखर अभिमानाची गोष्ट आहे. गावामध्ये ‘टँकरमुक्त’ झाल्याचा फलक पाहून विशेष समाधान वाटले. गेल्या सव्वावर्षाच्या कार्यकाळात आपण प्रत्येक गाव आणि वाडी-वस्तीपर्यंत पोहोचून नागरिकांच्या समस्या जाणून घेत, त्या सोडवण्यासाठी सातत्याने प्रयत्न करत असल्याचे त्यांनी नमूद केले.
खताळ यांनी राजस्थानातील पर्यटन विकासाचे उदाहरण देत सांगितले की, राजस्थान राज्याने पर्यटनाच्या माध्यमातून मोठ्या प्रमाणात प्रगती साधली आहे. याच धर्तीवर संगमनेर तालुक्यातही पर्यटनवृद्धीची मोठी संधी उपलब्ध आहे. सावरगाव घुलेसह पठार भागातील धार्मिक, ऐतिहासिक आणि नैसर्गिक स्थळांचा नियोजनबद्ध विकास केल्यास या भागाला नवीन आर्थिक बळ मिळेल.
यातून स्थानिक युवकांना रोजगाराच्या संधी निर्माण होऊन गावांच्या सर्वांगीण विकासाला चालना मिळेल. त्यामुळे देवस्थानांचा विकास, पायाभूत सुविधा आणि पर्यटनदृष्ट्या आवश्यक सोयी-सुविधा उभारण्यावर आपला विशेष भर असल्याचे त्यांनी स्पष्ट केले.