महाराष्ट्र संवाद न्यूज ऑनलाईन, संगमनेर:
न्यायालयाने आदेश देऊनही पत्नी आणि मुलांच्या पोटगीची रक्कम न भरणाऱ्या पतीला संगमनेर शहर पोलिसांनी बेड्या ठोकल्या आहेत. या प्रकरणात पीडित महिलेला न्याय मिळवून देण्यासाठी ‘देवा ग्रुप फाउंडेशन’ने पुढाकार घेतला होता.
आरोपी सरफराज कादर खान पठाण (रा. जमजम कॉलनी, संगमनेर) याने न्यायालयाच्या आदेशानुसार पत्नी व दोन मुलींच्या उदरनिर्वाहासाठी दरमहा १० हजार रुपये देणे बंधनकारक होते. मात्र, त्याने जाणीवपूर्वक या आदेशाचे उल्लंघन केले असून, त्याच्याकडे आतापर्यंत एकूण ३,९७,५०० रुपयांची थकबाकी जमा झाली होती.
या अन्यायाविरुद्ध दाद मागण्यासाठी पीडित महिला, तिचे वडील आणि दोन लहान मुलींसह देवा ग्रुपचे पदाधिकारी संगमनेर शहर पोलीस स्टेशनमध्ये पोहोचले. तेथे पोलीस निरीक्षक समीर बारवकर यांच्याकडे कैफियत मांडल्यानंतर पोलिसांनी तातडीने सूत्रे हलवली. पीआय बारवकर यांनी आरोपीच्या घरी जाऊन त्याला अटक करण्याचे आदेश पोलिसांना दिले.
त्यानुसार पोलिसांनी सरफराज पठाण याला ताब्यात घेऊन पोलीस ठाण्यात आणले. न्यायालयाने या आरोपीला २५ एप्रिल २०२६ पर्यंत हजर करण्याचे आदेश दिले असून पुढील तपास पोलीस करत आहेत.
