महाराष्ट्र संवाद न्यूज ऑनलाईन, संगमनेर:
तालुक्यातील वडगाव पान येथील ‘दत्तधाम सरकार’ आश्रमाचा सर्वेसर्वा भोंदू बाबा गडगेबाबा याच्या अडचणीत आता मोठी वाढ झाली आहे. पोलीस कारवाईत आश्रम सील झाल्यानंतर आता महावितरणनेही या भोंदू बाबाला दणका दिला असून, वीज चोरी प्रकरणी सुमारे १ लाख ७८ हजार रुपयांच्या दंडाची नोटीस बजावली आहे.
अधिकृत मीटरला बायपास करून ही वीज चोरी केली जात असल्याचे तपासात उघड झाले असून, आठवडाभरात दंडाची रक्कम न भरल्यास बाबावर वीज चोरीचा स्वतंत्र गुन्हा दाखल केला जाणार आहे.
गेल्या तीन दशकांपासून अडल्या-नडल्या लोकांच्या अगतिकतेचा फायदा घेऊन त्यांची आर्थिक लूट करणाऱ्या या बाबाच्या काळ्या कर्तृत्वाच्या कथा आता एकामागून एक समोर येऊ लागल्या आहेत. सुरुवातीच्या काळात गवंडी काम करणारा आणि सिमेंटच्या पाण्याच्या टाक्या बांधणारा हा तोतया बाबा चार एकरच्या विस्तीर्ण परिसरात कोट्यवधींच्या मालमत्तेवर डोलारा उभा करून बसला होता. स्वतःच्या आश्रमात लाखो रुपये किमतीच्या सिंहासनावर बसून तो रुग्णांवर उपचार करण्याचे थोतांड माजवत असे. आपण पैसे घेत नसल्याचा आव आणणाऱ्या या बाबाने होम-हवनाच्या नावाखाली प्रत्येकी ११ ते ५१ हजार रुपये उकळल्याचे तपासात निष्पन्न झाले असून, पावती मागणाऱ्यांना ‘अन्नदान वर्गणी’च्या पावत्या देऊन त्याने लोकांची दिशाभूल केली आहे.
नाशिकमधील कुप्रसिद्ध भोंदू बाबा अशोक खरात याच्याप्रमाणेच गडगेबाबानेही ठिकठिकाणी जमिनींची खरेदी केल्याची चर्चा असून, या अफाट संपत्तीचा विनियोग त्याने कुठे केला, याचा शोध घेण्याचे मोठे आव्हान पोलिसांसमोर आहे. यासोबतच आश्रमात येणाऱ्या महिलांशी त्याने काही गैरवर्तन केले आहे का, या दिशेनेही तपास सुरू असून पीडितांनी न घाबरता तक्रारीसाठी पुढे यावे, असे आवाहन पोलिसांनी केले आहे. दरम्यान, पोलीस कोठडीत असलेल्या बाबाला घेऊन आश्रमाची झडती घेण्यात आली, तेव्हाही त्याने आपली बाजू मांडण्याचा प्रयत्न करत जुन्याच गुर्मीत वागण्याचा प्रयत्न केला.
विशेष म्हणजे, ज्या सोशल मीडियाचा वापर करून या भोंदू बाबाने आपल्या व्यवसायाची जाहिरात केली, तोच सोशल मीडिया त्याला नडला आहे. इंस्टाग्रामसारख्या प्लॅटफॉर्मवर मंत्राने कॅन्सरची गाठ विरघळवण्याचे खोटे दावे करणारे व्हिडिओ त्याने प्रसिद्ध केले होते. या व्हिडिओंमुळे राज्यभरातून रुग्ण त्याच्याकडे आकर्षित झाले खरे, पण याच व्हिडिओंनी तो अंधश्रद्धा निर्मूलन समिती आणि पोलिसांच्या रडारवर आला. गेली ३०-३५ वर्षे बिनबोभाटपणे सुरू असलेला हा लुटमारीचा धंदा अखेर सोशल मीडियावरील प्रसिद्धीच्या हव्यासामुळेच उघडकीस आला आणि भोंदू बाबाच्या पापाचा घडा भरला.
