दोन बहिणींच्या छेडछाड प्रकरणी संगमनेरमध्ये एकावर गुन्हा; ‘BNS’ आणि ‘पोक्सो’ कलमान्वये कारवाई
महाराष्ट्र संवाद न्यूज ऑनलाईन, संगमनेर:
दोन सख्या बहिणींचा वारंवार पाठलाग करून त्यांना मैत्रीसाठी आणि मोबाईल नंबरसाठी त्रास देणाऱ्या एका २४ वर्षीय तरुणाला पोलिसांनी ताब्यात घेतले असून याप्रकरणी संगमनेर शहर पोलीस ठाण्यात संबंधित तरुणाविरुद्ध विविध कलमान्वये गुन्हा दाखल करण्यात आला आहे.
रविवारी (१० मे २०२६) मध्यरात्री सव्वा एकच्या सुमारास या गुन्ह्याची अधिकृत नोंद करण्यात आली असून मिळालेल्या माहितीनुसार, एका २४ वर्षीय महिलेने याप्रकरणी फिर्याद दिली आहे. फिर्यादी महिला सध्या आपल्या माहेरी वास्तव्यास आहे. दि. ४ मे २०२६ रोजी रात्रीच्या सुमारास फिर्यादी आणि त्यांची १४ वर्षीय लहान बहीण घराबाहेर फिरत असताना, दुचाकीवर आलेल्या दोन तरुणांपैकी एकाने त्यांचा मोबाईल नंबर मागण्याचा प्रयत्न केला. त्यानंतर सलग काही दिवस संबंधित तरुण या दोन्ही बहिणींचा पाठलाग करत होता.
दि. ८ मे रोजी रात्री पुन्हा या तरुणाने आईस्क्रीमच्या दुकानापाशी या दोघींना अडवून मैत्री करण्याची मागणी केली आणि मोबाईल नंबरसाठी तगादा लावला. यावेळी दोन्ही बहिणींनी त्यास हटकले असता त्याने आपले नाव सौरभ पानसरे (रा. जाखुरी, ता. संगमनेर) असल्याचे सांगितले. हा प्रकार एवढ्यावरच थांबला नाही, तर दि. ९ मे रोजी रात्री साडेदहाच्या सुमारास या तरुणाने फिर्यादीच्या चुलत बहिणीमार्फत त्यांना घराबाहेर बोलावून घेतले. वारंवार होणाऱ्या या त्रासामुळे फिर्यादीच्या पालकांनी आणि परिसरातील नागरिकांनी या तरुणाला रंगेहाथ पकडले. नागरिकांनी पकडल्यानंतरही त्याने ‘तुमच्याकडे बघून घेतो’ अशी धमकी दिली, मात्र उपस्थित नागरिकांनी त्याला तात्काळ पोलिसांच्या ताब्यात दिले.
संगमनेर शहर पोलिसांनी या प्रकरणी सौरभ सुभाष पानसरे याच्याविरुद्ध भारतीय न्याय संहिता (BNS) २०२३ चे कलम ७८, ३५१(२) आणि बालकांचे लैंगिक अपराधांपासून संरक्षण अधिनियम (POCSO) २०१२ च्या कलम १२ अन्वये गुन्हा नोंदवला आहे. या घटनेचा पुढील तपास पोलीस उपनिरीक्षक इमरान खान करत आहेत.
