महाराष्ट्र संवाद न्यूज ऑनलाईन, संगमनेर:
संगमनेरचे आमदार अमोल खताळ पाटील यांच्या वाढदिवसाचे औचित्य साधून युवक कार्यकर्त्यांच्या वतीने सामाजिक बांधिलकी जपत एक स्तुत्य उपक्रम राबविण्यात आला. यावेळी कार्यकर्त्यांनी आमदारांचा सत्कार करत ५० डझन फुलस्केप वह्या भेट दिल्या. या वह्या गरजू विद्यार्थ्यांच्या शैक्षणिक मदतीसाठी वापरल्या जाणार आहेत.
आमदार अमोल खताळ पाटील यांचा आणि युवा कार्यकर्ते सुवेद इनामदार यांचा वाढदिवस एकाच दिवशी असल्याने उत्साहात भर पडली होती. स्वतःचा वाढदिवस असतानाही सुवेद इनामदार यांनी सामाजिक कार्याला प्राधान्य देत हा उपक्रम राबवला. ही बाब लक्षात घेत, आमदार अमोल खताळ पाटील यांनी सुवेद इनामदार यांचा विशेष सत्कार करून त्यांना पुढील वाटचालीस शुभेच्छा दिल्या.
याप्रसंगी सुवेद इनामदार, ऋतिक हिरे, विशाल पावसे, संदिप डोंगरे, ओंकार भांड, संतोष दराडे, गौरव बोऱ्हाडे, समर्थ पावबाके आणि सूरज धात्रक या युवकांनी उपस्थित राहून आमदारांना शुभेच्छा दिल्या. वाढदिवसाचा बडेजाव न करता वह्यांच्या स्वरूपात दिलेली ही भेट शिक्षण क्षेत्रासाठी उपयुक्त ठरणार असल्याने, या सर्व तरुणांच्या उपक्रमाचे परिसरात कौतुक होत आहे.
