मॅनहोलकडून मशीनहोलकडे; संगमनेर नगरपरिषदेला १ कोटींचे अत्याधुनिक सक्शन व जेटिंग मशीन

महाराष्ट्र संवाद न्यूज ऑनलाईन, संगमनेर:

शहरातील सफाई कर्मचाऱ्यांची सुरक्षितता आणि सन्मान राखण्याच्या उद्देशाने शिवसेना महायुती सरकारने एक मोठे पाऊल उचलले आहे. “मॅनहोलकडून मशीनहोलकडे” या महत्त्वाकांक्षी योजनेअंतर्गत संगमनेर नगरपरिषदेला शहराच्या स्वच्छतेसाठी १ कोटी रुपये किमतीचे अत्याधुनिक वाहनयुक्त सक्शन व जेटिंग मशीन प्रदान करण्यात आले आहे. आमदार अमोल खताळ यांच्या विशेष प्रयत्नांतून आणि माध्यमातून हे मशीन उपलब्ध झाल असल्याची व या नव्या सुविधेमुळे संगमनेर नगरपरिषदेच्या स्वच्छता मोहिमेला आता एक नवी दिशा मिळणार असल्याची माहिती नगरसेवक साक्षी सूर्यवंशी यांनी दिली.

या आधुनिक यंत्रणेच्या उपलब्धतेमुळे आता हाताने मैला उचलण्याच्या अमानवी प्रथेला पूर्णविराम मिळणार असून, सफाई कर्मचाऱ्यांच्या जीविताचे संरक्षण होण्यास मोठी मदत होणार आहे. यामुळे कर्मचाऱ्यांना अधिक सुरक्षित आणि सन्मानजनक जीवन जगता येणार आहे.

शिवसेना मुख्य नेते आणि उपमुख्यमंत्री एकनाथ शिंदे यांच्या नगरविकास विभागामार्फत ही लोककल्याणकारी योजना राबविण्यात येत आहे. या नव्या तंत्रज्ञानामुळे संगमनेर शहराची स्वच्छता व्यवस्था पूर्वीपेक्षा अधिक सक्षम, गतिमान आणि आधुनिक बनणार आहे. मानवी आरोग्याला घातक ठरणाऱ्या कामांमध्ये आता या मशीनचा वापर केला जाणार असल्याने कर्मचाऱ्यांमध्ये समाधानाचे वातावरण आहे.

संगमनेर शहराच्या विकासात आणि स्वच्छता व्यवस्थेत मानाचा तुरा रोवणाऱ्या या अत्याधुनिक मशीनची उपलब्धता करून दिल्याबद्दल मुख्यमंत्री देवेंद्र फडणवीस, उपमुख्यमंत्री तथा नगरविकास मंत्री एकनाथ शिंदे, उपमुख्यमंत्री सुनेत्रा पवार तसेच जिल्ह्याचे पालकमंत्री राधाकृष्ण विखे पाटील यांचे जाहीर आभार मानले आहेत.