ही कारवाई काल (शुक्रवार ५ जून) दुपारी १ वाजेच्या सुमारास करण्यात आली. याबाबत सविस्तर वृत्त असे की, कोल्हेवाडी रोड परिसरातील एका नामांकित हॉटेलला मोठ्या प्रमाणावर वीज पुरवठा लागतो. या हॉटेल चालकाने विजेचे पैसे वाचवण्यासाठी डीपीवरून चोरून वीज वापरण्यास सुरुवात केली होती. ही वीज चोरी कंत्राटी वायरमन गणेश दातीर याने पकडली. वीज चोरी पकडल्यानंतर दातीर याने हॉटेल चालकाला वरिष्ठ अधिकाऱ्यांची आणि मोठ्या कारवाईची भीती दाखवली. कारवाई टाळण्यासाठी हॉटेल चालकाने प्रकरण तिथेच मिटवण्याची तयारी दर्शवली. याचाच गैरफायदा घेत वायरमन दातीर याने ५० हजार रुपयांच्या लाचेची मागणी केली.
तक्रारदाराच्या अर्जाची शहानिशा केल्यानंतर नगर लाचलुचपत विभागाचे पथक आज दुपारी संगमनेरात दाखल झाले. लाच मागितल्याचे स्पष्ट झाल्याने पथकाने त्याला बेड्या ठोकल्या. या धक्कादायक कारवाईमुळे संगमनेर परिसरात मोठी खळबळ उडाली आहे.
