संगमनेरमध्ये वृद्ध शेतकऱ्याला भरदुपारी लुटले; पावणेदोन लाखांच्या रोकडसह धनादेश लंपास

महाराष्ट्र संवाद न्यूज ऑनलाईन, संगमनेर:

बँकेतून पैसे काढून घराकडे चाललेल्या एका वृद्ध शेतकऱ्याचे लक्ष विचलित करून, दोन अज्ञात चोरट्यांनी त्यांच्या स्कूटीला लटकवलेली पैशांची पिशवी चोरून नेल्याची धक्कादायक घटना बुधवार, ३ जून रोजी दुपारी पावणेदोनच्या सुमारास सुकेवाडी कुरण रस्त्यावर घडली.

शेतकऱ्याकडील पिशवीत १ लाख ७५ हजार रुपयांची रोख रक्कम आणि सुमारे ३ लाख रुपयांचे सह्या केलेले दोन धनादेश होते. याप्रकरणी संगमनेर शहर पोलीस ठाण्यात दोन अज्ञात आरोपींविरुद्ध गुन्हा दाखल करण्यात आला आहे.

सुकेवाडी येथील ६९ वर्षीय शेतकरी सुरेश बाळकृष्ण शेटे यांनी एका व्यवहारापोटी मिळालेल्या तीन धनादेशांपैकी १ लाख ७५ हजार रुपयांचा एक धनादेश येथील बँक ऑफ बडोदाच्या शाखेतून वटवला होता. मिळालेली रोख रक्कम आणि उरलेले दोन धनादेश त्यांनी आपल्या जेवणाच्या डब्याच्या पिशवीत ठेवले. ही पिशवी आपल्या ॲक्टिव्हा स्कूटीच्या हँडलला अडकवून ते कुरण रस्त्याने घराकडे निघाले होते.

रस्त्यावरील एका वळणावर पाठीमागून मोटारसायकलवरून आलेल्या दोन अज्ञात तरुणांनी शेटे यांना थांबवले. बाबा, तुमचे पैसे आणि मोबाईल खाली पडला आहे, असे सांगून त्यांनी शेटे यांचे लक्ष विचलित केले. शेटे पाठीमागे पाहू लागताच, चोरट्यांनी हँडलला लटकवलेली पिशवी हिसकावून अवघ्या काही सेकंदात तिथून पळ काढला. अचानक घडलेल्या या प्रकारामुळे शेटे पुरते हादरून गेले.

पैसे चोरीला गेल्याचे लक्षात येताच शेटे यांनी तातडीने संबंधित व्यक्तीला संपर्क साधला आणि बँकेतील व्यवहार थांबवण्यास सांगितले, यामुळे धनादेशांचा गैरवापर टळला आणि पुढील मोठा अनर्थ टळला. चोरट्यांनी बँकेपासूनच पाळत ठेवून हा कट रचल्याचा संशय व्यक्त होत आहे. सुरेश शेटे यांच्या फिर्यादीवरून संगमनेर शहर पोलिसांनी भारतीय न्याय संहितेच्या कलम ३०३ (२) नुसार गुन्हा दाखल केला असून, पोलीस निरीक्षक समीर बारवकर यांच्या मार्गदर्शनाखाली हेड कॉन्स्टेबल मुंढे या घटनेचा पुढील तपास करत आहेत.