धार्मिक कार्यानंतर नदीत पोहण्यासाठी गेलेल्या दोघांचा बुडून मृत्यू

महाराष्ट्र संवाद न्यूज | अहिल्यानगर

अहिल्यानगर जिल्ह्यातील नेवासा तालुक्यातील जुने भालगाव येथे नदीच्या पाण्यात बुडून दोघांचा दुर्दैवी मृत्यू झाला. भास्कर देवराव तनपुरे (वय ५०, व्यावसायिक शेतकरी) आणि सार्थक गणेश निमसे (वय १६, इयत्ता दहावीचा विद्यार्थी) अशी मृतांची नावे आहेत. या दोन्ही मृतांना धार्मिक कार्याची प्रचंड आवड होती.

मिळालेल्या माहितीनुसार, जुने भालगाव येथील प्रसिद्ध महादेव मंदिरात दर सोमवारी कीर्तन व भंडाऱ्याचे आयोजन केले जाते. सोमवारी या धार्मिक कार्यक्रमाच्या स्वयंपाकात आणि तयारीत दोघांनीही उत्साहाने सहभाग घेतला होता. त्यानंतर दुपारी दीड वाजेच्या सुमारास दोघे नदीत पोहण्यासाठी गेले, मात्र ते घरी परतलेच नाहीत. ते कीर्तनासाठी थांबले असावेत असे वाटल्याने रात्रीपर्यंत कोणाच्या लक्षात आले नाही.

मंगळवारी सकाळी नदीकाठी मासेमारीसाठी गेलेल्या तरुणांना त्यांचे कपडे आढळले आणि त्यानंतर शोध घेतला असता दोघांचे मृतदेह पाण्यावर तरंगताना दिसून आले. पोहताना पाण्याचा अंदाज न आल्याने हा अपघात घडल्याचा प्राथमिक अंदाज आहे.

घटनेची माहिती मिळताच शिवशंभो रुग्णवाहिका सेवेच्या मदतीने दोन्ही मृतदेह उत्तरीय तपासणीसाठी नेवासा फाटा येथील ग्रामीण रुग्णालयात पाठवण्यात आले, तेथे डॉक्टरांनी त्यांना मृत घोषित केले. मृत भास्कर तनपुरे यांच्या पश्चात पत्नी, एक मुलगा आणि दोन मुली असा परिवार आहे,

तर सार्थक निमसे हा आई-वडिलांचा एकुलता एक मुलगा होता. धार्मिक कार्यात आनंदाने सहभागी झाल्यानंतर अवघ्या काही तासांतच दोघांवर काळाने घाला घातल्यामुळे संपूर्ण जुने भालगाव परिसरावर शोककळा पसरली आहे. पोलीस या प्रकरणी पुढील तपास करत आहेत.