मोहसीन शेख,
संगमनेर
नवीन शैक्षणिक वर्षाच्या प्रारंभी अँग्लो उर्दू हायस्कूल, संगमनेर येथे विद्यार्थ्यांचे उत्साहपूर्ण वातावरणात स्वागत करण्यात आले. शाळेच्या पहिल्याच दिवशी इयत्ता ५ वी ते ८ वीच्या विद्यार्थ्यांना शासनामार्फत प्राप्त झालेल्या पाठ्यपुस्तकांचे वाटप करण्यात आले. तसेच विद्यार्थ्यांना गुलाबपुष्प व पेन देऊन त्यांचा सत्कार करण्यात आला.
या कार्यक्रमास विद्यालयाचे चेअरमन शेख गनी हाजीसेठ, अंजुमन-ए-इस्लाम ट्रस्टचे चीफ ट्रस्टी अब्दुल्लाह हाजी हसन चौधरी, सेक्रेटरी हाजी पठाण शौकतखान मोहंमदखान, ट्रस्टी हाजी शेख एजाज शमशुद्दीन तसेच शालेय समिती सदस्य हाजी इनामदार शमशुद्दीन जैनुद्दीन उपस्थित होते. मान्यवरांच्या हस्ते विद्यार्थ्यांचे स्वागत करून त्यांना शिक्षणाचे महत्त्व, शालेय शिस्त आणि उज्ज्वल भवितव्यासाठी आवश्यक मार्गदर्शन करण्यात आले.
यावेळी विद्यालयाचे मुख्याध्यापक शेख मुनव्वर खलीलुरहेमान यांनी विद्यार्थ्यांचे मनःपूर्वक स्वागत करत त्यांच्याशी संवाद साधला. नव्या शैक्षणिक वर्षाबाबत विद्यार्थ्यांच्या मनातील भीती दूर करून आनंददायी, गुणवत्तापूर्ण आणि खुले शिक्षणाचे वातावरण उपलब्ध करून देण्याचा विद्यालयाचा संकल्प असल्याचे त्यांनी सांगितले. विद्यार्थ्यांच्या सर्वांगीण विकासासाठी शिक्षकवृंद सातत्याने प्रयत्नशील राहील, असा विश्वासही त्यांनी व्यक्त केला.
अँग्लो उर्दू हायस्कूलच्या प्रगतीमध्ये विद्यालयाचे चेअरमन शेख गनी हाजीसेठ तसेच अंजुमन-ए-इस्लाम ट्रस्टच्या पदाधिकाऱ्यांचे योगदान विशेष उल्लेखनीय मानले जाते. विद्यार्थ्यांना दर्जेदार शिक्षण, आधुनिक सुविधा आणि सकारात्मक शैक्षणिक वातावरण उपलब्ध करून देण्यासाठी ट्रस्टने सातत्याने अथक परिश्रम घेतले आहेत. शाळेच्या भौतिक व शैक्षणिक विकासासाठी त्यांनी केलेल्या प्रयत्नांमुळे विद्यालयाची शैक्षणिक गुणवत्ता उंचावत असून पालक आणि विद्यार्थ्यांमध्ये विश्वासाचे वातावरण निर्माण झाले आहे. शिक्षण क्षेत्रातील त्यांच्या दूरदृष्टीमुळे अँग्लो उर्दू हायस्कूल हे संगमनेर परिसरातील एक प्रगत आणि विद्यार्थीकेंद्रित शैक्षणिक संस्था म्हणून ओळख निर्माण करत आहे.
कार्यक्रमाच्या शेवटी सर्व शिक्षक व शिक्षकेतर कर्मचाऱ्यांनी विद्यार्थ्यांचे स्वागत करून शासनामार्फत प्राप्त झालेल्या पुस्तकांचे वाटप केले. नव्या शैक्षणिक वर्षाची सुरुवात उत्साह, आनंद आणि प्रेरणादायी वातावरणात झाल्याने विद्यार्थ्यांमध्ये विशेष उत्साहाचे वातावरण पाहायला मिळाले.
