संगमनेरमध्ये नामांकित लॉजिस्टिक कंपनीची फ्रँचायझी देण्याच्या नावाखाली वैद्यकीय व्यावसायिकाला ५.५ लाखांचा गंडा

महाराष्ट्र संवाद न्यूज ऑनलाईन
​अहिल्यानगर:
डिलिव्हरी लॉजिस्टिक कंपनीची फ्रँचायझी मिळवून देण्याचे आमिष दाखवून संगमनेर येथील एका ४६ वर्षीय वैद्यकीय (मेडिकल) व्यावसायिकाची ५ लाख ५० हजार रुपयांची ऑनलाइन फसवणूक झाल्याचा धक्कादायक प्रकार उघडकीस आला आहे. या प्रकरणी अहिल्यानगरच्या सायबर पोलीस ठाण्यात गुन्हा दाखल करण्यात आला असून पोलीस आरोपींचा शोध घेत आहेत.
​पावबाकी रोड परिसरात राहणाऱ्या पीडित व्यावसायिकाला एका नामांकित डिलिव्हरी लॉजिस्टिक कंपनीची फ्रँचायझी घ्यायची होती. यासाठी त्यांनी इन्स्टाग्रामवर पाहिलेल्या एका जाहिरातीतील फॉर्म भरून आपली माहिती दिली. हीच माहिती सायबर चोरांच्या हाती लागली आणि फसवणुकीच्या जाळ्याला सुरुवात झाली. फॉर्म भरल्यानंतर मयांक गुप्ता, परमार आणि प्रियांका नावाच्या महिलेने पीडित व्यावसायिकाशी मोबाईलद्वारे संपर्क साधला आणि स्वतःला संबंधित कंपनीचे अधिकृत प्रतिनिधी भासविले.
​त्यानंतर नोंदणी प्रक्रिया, फ्रँचायझी मंजुरी आणि विविध शुल्काच्या नावाखाली आरोपींनी फिर्यादीचा विश्वास संपादन केला. त्यांच्या भूलथापांना बळी पडून व्यावसायिकाने वेळोवेळी एकूण ५ लाख ५० हजार रुपये ऑनलाइन ट्रान्सफर केले. मात्र, पैसे भरूनही फ्रँचायझी मिळाली नाही आणि आरोपींनी अचानक संपर्क तोडून प्रतिसाद देणे बंद केले. आपली फसवणूक झाल्याचे लक्षात येताच व्यावसायिकाने पोलिसांत धाव घेतली.
​हा सर्व प्रकार २० मार्च २०२६ ते ६ एप्रिल २०२६ दरम्यान घडला असून, या प्रकरणी २३ जून रोजी सायबर पोलीस ठाण्यात गुन्हा दाखल करण्यात आला आहे. फसवणुकीसाठी आरोपींनी अनेक बनावट मोबाईल क्रमांक आणि ई-मेल आयडींचा वापर केल्याचे तपासात समोर आले आहे.
पोलीस निरीक्षक सागर ढिकले या गुन्ह्याचा पुढील तपास करत असून, नागरिकांनी सोशल मीडियावरील कोणत्याही जाहिरातीला बळी पडू नये, असे आवाहन पोलिसांनी केले आहे.