महाराष्ट्र संवाद न्यूज ऑनलाईन संगमनेर: संगमनेर शहरात छत्रपती शिवाजी महाराज यांच्या भव्य अश्वारूढ पुतळ्यासह भारतरत्न डॉ. बाबासाहेब आंबेडकर यांच्या स्मारक उभारणीच्या मागणीला अखेर मोठे यश आले आहे. नगर परिषदेकडून या ऐतिहासिक कामासाठी अधिकृत निविदा प्रसिद्ध करण्यात आली असून, यामुळे शिवसेना (उद्धव बाळासाहेब ठाकरे) पक्ष, संगमनेर शिवजयंती उत्सव युवक समिती आणि शहरातील शिवभक्तांमध्ये आनंद व्यक्त होत आहे.
२६ मार्च २०२१ रोजी तत्कालीन नगराध्यक्ष दुर्गाताई तांबे यांच्याकडे शिवसेनेच्या वतीने कतारी यांनी निवेदन देत यासंबंधीची मागणी केली होती. त्यानंतर गेल्या अनेक वर्षांपासून शिवसेना ठाकरे गटाचे तत्कालीन शहर प्रमुख सध्याचे उपजिल्हाप्रमुख अमर कतारी, शिवजयंती उत्सव समिती व शिवभक्तांकडून या स्मारकांसाठी सातत्याने निवेदने देऊन पाठपुरावा केला जात होता. या मागणीला आता खऱ्या अर्थाने मूर्त स्वरूप येत आहे.
मिळालेल्या माहितीनुसार, संगमनेर बस स्थानक आवारातील प्रस्तावित चौथऱ्यावर छत्रपती शिवाजी महाराजांचा १५ फूट उंचीचा भव्य अश्वारूढ पुतळा ब्राँझ गनमेटल धातूपासून उभारण्यात येणार आहे. तसेच, शिवाजी चौकातील भारतरत्न डॉ. बाबासाहेब आंबेडकर यांच्या विद्यमान पुतळ्याच्या ठिकाणी १२ फूट उंचीचा पूर्णाकृती ब्राँझ गनमेटल पुतळा उभारण्याचे नियोजन करण्यात आले आहे.
या महत्त्वाकांक्षी प्रकल्पासाठी नगराध्यक्ष डॉ. मैथिली तांबे यांनी विशेष पुढाकार घेतला असून, मुख्याधिकारी दयानंद गोरे यांच्या नेतृत्वाखाली संगमनेर नगर परिषदेने ही अधिकृत निविदा प्रक्रिया सुरू केली आहे. या दोन्ही भव्य स्मारकांमुळे शहराच्या सौंदर्यात आणि ऐतिहासिक, सामाजिक वैभवात मोठी भर पडणार आहे.
या महत्त्वपूर्ण निर्णयाबद्दल शिवसेना ठाकरे गटाचे उपजिल्हाप्रमुख अमर कतारी यांनी समाधान व्यक्त केले आहे. त्यांनी नगराध्यक्ष डॉ. मैथिली तांबे, आमदार सत्यजित तांबे, आमदार अमोल खताळ, माजी मंत्री बाळासाहेब थोरात तसेच पालकमंत्री राधाकृष्ण विखे पाटील यांचे विशेष आभार मानले. नगरपरिषदेच्या या निर्णयाचे शहरप्रमुख अमित चव्हाण, फैसल सय्यद, पप्पू कानकाटे, तालुकाप्रमुख भीमाशंकर पावसे, युवासेना जिल्हाप्रमुख अक्षय गुंजाळ, अमोल डुकरे यांच्यासह शिवजयंती उत्सव युवक समितीचे सदस्य आणि सर्व शिवभक्तांनी उत्साहात स्वागत केले आहे.
