महाराष्ट्र संवाद न्यूज ऑनलाईन संगमनेर: डी. एस. गायकवाड प्रतिष्ठानच्या वतीने दरवर्षीप्रमाणे यंदाही राज्यस्तरीय बौद्ध वधू-वर परिचय संमेलन रविवारी (दिनांक १२ जुलै) संगमनेर-लोणी रोडवरील गणपती मंदिराजवळील वसंत लॉन्स येथे होणार असल्याची माहिती पत्रकार गौतम गायकवाड यांनी दिली.
सन २०११ पासून प्रतिष्ठानच्या वतीने बौद्ध समाजातील विवाहयोग्य युवक-युवतींसाठी या सामाजिक उपक्रमाचे सातत्याने व विनामूल्य आयोजन करण्यात येत आहे. डी. एस. गायकवाड प्रतिष्ठानने सुरू केलेल्या या कौतुकास्पद उपक्रमाला समाजातील सर्व स्तरातून मोठा पाठिंबा मिळत आला आहे.
यापूर्वी राज्याचे माजी महसूल मंत्री बाळासाहेब थोरात, कालकथित प्रेमानंद रूपवते, कालकथित स्नेहाजाताई रुपवते, केंद्रीय मंत्री रामदास आठवले, माजी आमदार डॉ. सुधीर तांबे, नवी मुंबईचे माजी महापौर सुधाकरराव सोनवणे, प्रा. एस. झेड. देशमुख, आमदार सत्यजित तांबे, माजी नगराध्यक्ष दुर्गाताई तांबे, लिज्जत पापडचे महाव्यवस्थापक सुरेशराव कोते, माजी मंत्री चंद्रकांत हंडोरे, कैलास सोमाणी आणि डॉ. गौतमी सोनवणे यांसह अनेक मान्यवरांनी या सेवाभावी उपक्रमाला प्रत्यक्ष भेटी देऊन प्रतिष्ठानच्या कार्यकर्त्यांच्या कार्याचा गौरव केला आहे.
या संमेलनाला संपूर्ण राज्यभरातून विवाहयोग्य युवक-युवती तसेच त्यांच्या पालकांचा दरवर्षी उत्स्फूर्त प्रतिसाद लाभतो. या व्यासपीठाच्या माध्यमातून आजवर अनेक युवक-युवतींचे तसेच घटस्फोटीत वधू-वरांचेही विवाह यशस्वीपणे जुळून आले आहेत. या आगामी संमेलनात सहभागी होण्यासाठी विवाहयोग्य वधू-वरांनी आपली नोंदणी करणे आवश्यक आहे.
अधिक माहिती व नोंदणीसाठी इच्छुकांनी यश टूर्स अँड ट्रॅव्हल्स, शासकीय विश्रामगृह, संगमनेर, जिल्हा अहिल्यानगर येथे संपर्क साधावा. पूर्णपणे मोफत असलेल्या या सामाजिक उपक्रमात समाजबांधवांनी व पालकांनी मोठ्या संख्येने सहभागी व्हावे, असे आवाहन संयोजक के. एस. गायकवाड, ए. पी. बनसोडे, विनोद गायकवाड आणि डि. के. जमधडे यांनी केले आहे.
