शिवसेना (उद्धव बाळासाहेब ठाकरे) पक्षाच्या संगमनेर पदाधिकाऱ्यांच्या नियुक्त्या जाहीर; अमर कतारी यांच्याकडे तालुकाप्रमुखपदाची धुरा, नव्या पदाधिकाऱ्यांमध्ये यांचा समावेश
नव्या पदाधिकाऱ्यांच्या निवडीची माहिती दैनिक सामना मधून देण्यात आली आहे
महाराष्ट्र संवाद न्यूज ऑनलाईन संगमनेर: शिवसेना पक्षाच्या मध्यवर्ती कार्यालयातून प्रसिद्ध करण्यात आलेल्या पत्रकानुसार, संगमनेर तालुक्यात नव्या दमाच्या आणि निष्ठावान पदाधिकाऱ्यांकडे पक्षाची महत्त्वाची जबाबदारी सोपवण्यात आली आहे. नव्या निवडीमध्ये काही पदाधिकाऱ्यांना नारळ देण्यात आला आहे.
शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या आदेशाने शिर्डी लोकसभा मतदारसंघातील विविध तालुक्यांच्या पदाधिकाऱ्यांच्या नियुक्त्या अधिकृतपणे जाहीर करण्यात आल्या आहेत. या नव्या निवडीनुसार संगमनेर तालुकाप्रमुखपदी अमर कतारी आणि भीमाशंकर पावसे, संगमनेर तालुक्यातील मात्र शिर्डी विधानसभा मतदारसंघात येणाऱ्या ३२ गावांसाठी तालुकाप्रमुख म्हणून प्रकाश गायकवाड यांचीदेखील तालुकाप्रमुख म्हणून नियुक्ती करण्यात आली आहे.
संगमनेर तालुक्यात पक्षाची बांधणी मजबूत करण्यासाठी उपजिल्हाप्रमुख म्हणून ग्रामीण भागासाठी सदाशिव हासे तर शहरी भागासाठी इम्तियाज शेख यांच्यावर विश्वास दाखवण्यात आला आहे. तसेच रवींद्र कानकाटे यांची उपजिल्हा संघटकपदी आणि रेवननाथ शिंदे यांची उपजिल्हा समन्वयक म्हणून निवड झाली आहे.
संगमनेर शहराच्या व विधानसभा मतदारसंघाच्या विस्तारासाठी देखील पक्षाने महत्त्वपूर्ण नियुक्त्या केल्या आहेत. यामध्ये बाळासाहेब घोडके (शहर) आणि योगेश खेमनर (ग्रामीण) यांची विधानसभाप्रमुख म्हणून निवड करण्यात आली आहे, तर दिलीप साळगट यांच्यावर सहसंपर्कप्रमुखपदाची जबाबदारी सोपवण्यात आली आहे. संगमनेर शहरप्रमुख म्हणून रवी गिरी (घुलेवाडी) कार्यभार पाहणार असून, सतीश भुजबळ यांची तालुका समन्वयक म्हणून नियुक्ती करण्यात आली आहे. तर काही दिवसांपूर्वीच निवड केलेल्या शहरातील पदाधिकाऱ्यांना कायम ठेवण्यात आले आहे.
या नियुक्त्यांमुळे शिर्डी लोकसभा मतदारसंघांतर्गत येणाऱ्या संगमनेर भागात शिवसेना (उद्धव बाळासाहेब ठाकरे) पक्षाला अधिक बळकटी मिळणार असून, आगामी निवडणुकांच्या पार्श्वभूमीवर ही नवी कार्यकारिणी अत्यंत सक्रियपणे काम करेल, असा विश्वास पक्षाच्या वरिष्ठ पातळीवरून व्यक्त केला जात आहे.
