कचरा वेचण्याच्या बहाण्याने ‘रेकी’; बंद घरे गाठून घरफोडी करणाऱ्या दोन महिला जेरबंद
ताब्यात घेतलेल्या दोन्ही महिलांकडून सुमारे दीड लाख रुपये किमतीची तांब्या-पितळेची भांडी व चोरीचे साहित्य जप्त केले असून, फरार झालेल्या आरोपींचा शोध सुरू आहे.
महाराष्ट्र संवाद न्यूज ऑनलाईन, आळेफाटा: हातात प्लास्टिकच्या रिकाम्या बाटल्या आणि पोती धरून कचरा गोळा करण्याचा बनाव करत बंद घरांची रेकी करून घरफोडी करणाऱ्या एका अट्टल टोळीचा आळेफाटा पोलिसांनी पर्दाफाश केला आहे. या प्रकरणी सतर्क नागरिकांच्या मदतीने दोन महिलांना मुद्देमालासह रंगेहाथ पकडण्यात पोलिसांना यश आले असून त्यांचे दोन साथीदार फरार झाले आहेत.
मिळालेल्या माहितीनुसार, आळेखिंड परिसरातील समाधान हॉटेलच्या मागील भागात दुपारच्या सुमारास हा प्रकार घडला. संतवाडी शिवारात राहणाऱ्या भामाबाई सोनभाऊ निमसे यांचे घर बंद असल्याचे पाहून ३ महिला व १ पुरुष अशा चार जणांच्या टोळीने दरवाजाचे कडी-कोयंडे तोडून आत प्रवेश केला. घरातील जुनी तांब्या-पितळची भांडी आणि पाण्याचा बंब त्यांनी आणलेल्या पोत्यात भरण्यास सुरुवात केली.
दरम्यान, बंद घरातून संशयास्पद आवाज आल्यामुळे भामाबाईंना संशय आला. त्यांनी खिडकीतून डोकावून पाहिले असता, कचरा वेचण्याच्या बहाण्याने आलेल्या महिला घरातील सामान चोरताना दिसल्या. भामाबाईंनी तत्काळ आरडाओरड केल्याने परिसरातील नागरिक धावून आले. नागरिकांनी पाठलाग करून दोन महिलांना गनिमी काव्याने पकडले, तर एक महिला आणि एक पुरुष पसार होण्यात यशस्वी झाले.
हे आरोपी जुन्नर तालुक्यातील सराईत गुन्हेगार असण्याची शक्यता वर्तवली जात आहे. संशय येऊ नये म्हणून हातात रिकाम्या बाटल्या घेऊन फिरायचे आणि बंद घर दिसताच लोखंडी हत्याराने दरवाजा तोडून चोरी करायची, असा यांचा फंडा होता. आळेफाटा पोलिसांनी ताब्यात घेतलेल्या दोन्ही महिलांकडून सुमारे दीड लाख रुपये किमतीची तांब्या-पितळेची भांडी व चोरीचे साहित्य जप्त केले असून, फरार झालेल्या आरोपींचा शोध सुरू आहे.
