संगमनेर पोलिसांनी कारवाई करत बेकायदेशीर गोमांसाची वाहतूक करणारी एक इनोव्हा गाडी जप्त केली आहे. या कारवाईत पोलिसांनी ४ लाख रुपयांची इनोव्हा कार आणि २ लाख ७० हजार रुपये किमतीचे ९०० किलो गोमांस असा एकूण ६ लाख ७० हजार रुपयांचा मुद्देमाल हस्तगत केला आहे.
मिळालेल्या माहितीनुसार, शनिवारी (१ ऑगस्ट) रात्री १:५५ वाजेच्या सुमारास संगमनेर येथील जमजम कॉलनी क्रमांक १० च्या रस्त्याकडेला एक संशयास्पद इनोव्हा गाडी (क्र. MH 12 KA 4795) उभी असल्याचे पोलिसांच्या निदर्शनास आले. पोलिसांनी जाऊन पाहणी केली असता या वाहनामध्ये मानवी आरोग्यास धोकादायक ठरेल अशा पद्धतीने गोवंशाचे कापलेले मांस भरलेले आढळले.
पोलीस पथक जवळ पोहोचताच गाडीजवळ उभा असलेला अज्ञात आरोपी अंधाराचा फायदा घेऊन पसार झाला. राज्यात गोवंश हत्याबंदी असतानाही केवळ विक्रीच्या उद्देशाने ही अवैध वाहतूक सुरू असल्याचे तपासात उघड झाले आहे.
या प्रकरणी मोटर परिवहन विभागाचे पोलीस शिपाई कातिक अरविंद बेनके यांच्या फिर्यादीवरून संगमनेर शहर पोलीस ठाण्यात अज्ञात आरोपीविरोधात बीएनएस कलम २७१, ३२५ तसेच महाराष्ट्र पशु संरक्षण कायद्यांतर्गत गुन्हा नोंदवण्यात आला आहे.
पोलीस निरीक्षक समीर बारवकर यांच्या मार्गदर्शनाखाली महिला पोलीस हेड कॉन्स्टेबल सुजाता थोरात या प्रकरणाचा पुढील तपास करत असून फरार आरोपीचा शोध सुरू आहे.
