हक्काच्या रेल्वेसाठी क्रांतीदिनी हजारो नागरिक रस्त्यावर उतरणार; नाशिक – पुणे रेल्वेसाठी चक्काजाम होणारच

महाराष्ट्र संवाद न्यूज ऑनलाईन
संगमनेर:
उत्तर आणि पश्चिम महाराष्ट्राच्या विकासाचा कणा ठरणाऱ्या नाशिक-पुणे थेट रेल्वे मार्गासाठी क्रांतीदिनी हजारो नागरिक रस्त्यावर उतरणार असून नाशिक-पुणे महामार्ग आणि समृद्धी महामार्गावर सकाळी नऊ वाजता तीव्र चक्काजाम आंदोलन करण्यात येणार आहे.
संगमनेर, सिन्नर, अकोले, नारायणगाव, जुन्नर, मंचर, खेड आणि चाकण या संपूर्ण पट्ट्यातील जनतेच्या हक्काच्या या रेल्वेसाठी सर्वपक्षीय नागरिक, युवक आणि महिला या आंदोलनात पूर्ण ताकदीने सहभागी होणार आहेत.
नाशिक-पुणे-मुंबई या गोल्डन ट्रँगलच्या विकासासाठी नाशिक-पुणे रेल्वे मार्ग अत्यंत महत्त्वाचा असून लोकनेते बाळासाहेब थोरात यांनी १९९८ पासून या थेट रेल्वेसाठी सातत्याने पाठपुरावा केला आहे. तत्कालीन रेल्वेमंत्री ममता बॅनर्जी यांच्यापासून ते केंद्रीय रेल्वे मंत्रालय आणि महारेलपर्यंत केलेल्या प्रयत्नांमुळे हा प्रश्न अंतिम टप्प्यात आला होता.
महाविकास आघाडी सरकारच्या काळात या हायस्पीड रेल्वेसाठी संगमनेर तालुक्यातील २६ गावांमधील २८५ हेक्टर भूसंपादन पूर्ण होऊन शेतकऱ्यांना सुमारे ६८४ कोटी रुपयांचा मोबदलाही वाटप करण्यात आला होता. मात्र, राज्यातील सत्तांतरानंतर या थेट रेल्वेचा मार्ग बदलण्यात आल्यामुळे संपूर्ण परिसरातील जनतेमध्ये तीव्र संताप व्यक्त होत आहे.
हा अन्याय दूर करण्यासाठी आमदार सत्यजित तांबे यांनी सर्व लोकप्रतिनिधींची मोट बांधली असून बाळासाहेब थोरात यांनी केंद्र सरकारकडे तर आमदार तांबे यांनी राज्य सरकारकडे सातत्याने पाठपुरावा केला आहे. आता ही लढाई जनतेच्या न्यायालयात नेण्यासाठी क्रांतीदिनाचे औचित्य साधून संपूर्ण परिसरात मोठी जनजागृती करण्यात आली आहे.
संगमनेर तालुक्यातील हिवरगाव पावसा येथे राज्याचे माजी मंत्री बाळासाहेब थोरात, आमदार सत्यजित तांबे, माजी आमदार डॉ. सुधीर तांबे आणि डॉ. जयश्रीताई थोरात यांच्या नेतृत्वाखाली नागरिक एकत्र येणार आहेत. या आंदोलनाला पद्मश्री रघुवीर खेडकर आणि महाराष्ट्र केसरी हर्षवर्धन सदगीर यांच्यासह कला, क्रीडा, शिक्षण व व्यापार क्षेत्रातील मान्यवरांनी पाठिंबा दिला आहे.
हिवरगाव पावसासह सिन्नर येथील समृद्धी महामार्ग, आळेफाटा, नारायणगाव, मंचर, खेड आणि चाकण येथेही एकाच वेळी नऊ वाजता रास्ता रोको केला जाणार असून, भावी पिढ्यांच्या उज्ज्वल भविष्यासाठी नागरिकांनी या आंदोलनात मोठ्या संख्येने सहभागी व्हावे, असे आवाहन आमदार सत्यजित तांबे यांनी केले आहे.

या आंदोलनात मोठ्या संख्येने सहभागी व्हावे, असे आवाहन आमदार सत्यजित तांबे यांनी केले आहे.