आमदारकी पणाला लावण्यापासून आमरण उपोषणापर्यंतचा प्रवास; पुणे नाशिक रेल्वे प्रश्नावर आमदारांची भूमिका बदलती राहिल्याचा कृती समितीच्या आरोप! चक्काजाम आंदोलनात सहभागी होण्याचे आवाहन

महाराष्ट्र संवाद न्यूज ऑनलाईन
संगमनेर:
पुणे-नाशिक रेल्वे प्रकल्पाच्या प्रश्नावरून संगमनेर तालुक्यातील राजकीय आणि सामाजिक वातावरण चांगलेच तापले आहे. या प्रकल्पाच्या मागणीसाठी पुणे-नाशिक रेल्वे कृती समितीच्या वतीने आज रविवारी ऐतिहासिक चक्काजाम आंदोलनाची हाक देण्यात आली आहे. या आंदोलनाच्या पूर्वसंध्येला संगमनेरचे आमदार अमोल खताळ यांनी वेळप्रसंगी आमरण उपोषण करण्याची तयारी दर्शविल्याने या प्रश्नाला एक नवे वळण मिळाले आहे. कृती समितीने आमदार खताळ यांच्या बदलत्या भूमिकेवर तीव्र आक्षेप घेत, त्यांना केवळ घोषणा व बैठकांपर्यंत न थांबता चक्काजाम आंदोलनात आपल्या सर्व कार्यकर्त्यांसह प्रत्यक्ष सहभागी होण्याचे थेट आवाहन केले आहे.
आमदारांच्या आमरण उपोषणाच्या भूमिकेनंतर आंदोलनात काय घडामोडी घडतात, याकडे संपूर्ण संगमनेरकरांचे लक्ष लागले आहे. रेल्वे कृती समितीने आमदार अमोल खताळ यांच्या राजकीय प्रवासावर टीका करताना म्हटले आहे की, सुरुवातीला रेल्वेचा प्रश्न मार्गी न लागल्यास आमदारकी पणाला लावण्याची घोषणा त्यांनीच केली होती. त्यानंतर राज्य सरकार या रेल्वेसाठी १०० टक्के खर्च करणार असल्याचे सांगितले गेले, तर पुढे यातील अडथळ्यांचा अभ्यास करण्यासाठी डॉ. अनिल काकोडकर यांच्या अध्यक्षतेखाली समिती स्थापन केल्याचा मोठा गाजावाजा करण्यात आला.
मात्र या सर्वांनंतरही प्रत्यक्षात प्रश्न सुटलेला नाही. कृती समितीने चक्काजामची हाक देताच या आंदोलनाचा धसका घेऊन आमदारांनी तडकाफडकी दिल्ली गाठून केंद्रीय रेल्वेमंत्री अश्विनी वैष्णव यांची भेट घेतली. आता आंदोलनाच्या तोंडावर त्यांनी आमरण उपोषणाची घोषणा केली आहे. यावरून आमदारांना आता रेल्वे प्रश्नाची खरी वस्तुस्थिती समजल्याचे स्पष्ट होत असून, त्यांनी आपल्या कार्यकर्त्यांसह आंदोलनात सहभागी व्हावे असे समितीने नमूद केले आहे.
माजी मंत्री बाळासाहेब थोरात यांच्या ४० वर्षांच्या कार्यकाळावर आमदार खताळ यांनी नेहमीच प्रश्न उपस्थित केले होते. यावर बोलताना कृती समितीने स्पष्ट केले की, बाळासाहेब थोरात यांनी आपल्या कार्यकाळात रेल्वे प्रकल्पासाठी आवश्यक जमीन अधिग्रहणाची प्रक्रिया प्रत्यक्ष पुढे नेऊन आपले कर्तृत्व सिद्ध केले आहे. त्यामुळे केवळ आश्वासने आणि घोषणा नकोत, तर प्रत्यक्ष काम आणि ठोस निर्णय हवा अशी ठाम भूमिका समितीने घेतली आहे.
हा प्रश्न कोणत्याही एका पक्षाचा किंवा व्यक्तीचा नसून संपूर्ण तालुक्याच्या विकासाशी निगडित असल्याने राजकीय मतभेद बाजूला ठेवून सर्व पक्ष, सामाजिक संघटना, व्यापारी, शेतकरी, विद्यार्थी व नागरिकांनी एकत्र येण्याचे आवाहन करण्यात आले आहे. रविवारचा दिवस संगमनेरच्या इतिहासातील अत्यंत महत्त्वाचा आणि निर्णायक ठरणार असून लोकप्रतिनिधी म्हणून आमदार खताळ ही ऐतिहासिक संधी दवडणार नाहीत, अशी अपेक्षा व्यक्त करण्यात आली आहे.
या संपूर्ण लढ्यात आणि चक्काजाम आंदोलनाच्या हाकेमध्ये कृती समितीचे समन्वयक निलेश गुंजाळ, अनिल गुंजाळ, संदीप काकड, डॉ. सचिन वाळे, ॲड. अनिल गोडसे, राम अरगडे, अरुण चव्हाण, ओंकार बिडवे, सत्यजित थोरात, प्रवीण काकड, राहुल गायकर, मोहसीन शेख, सतीश खताळ, प्रदीप हासे, रवींद्र हासे, प्रवीण हासे, रामेश्वर पानसरे, प्रितम साबळे, अजय हासे, शिवाजी जगताप, विजय उदावंत, अमोल ढोले, आनंद खतोडे, सनी अभंग, अमोल शेलकर, शिवाजी गुंजाळ, निलेश गुंजाळ, प्रकाश कडलग आणि ॲड. समीर लामखडे यांनी सक्रिय सहभाग नोंदवत आंदोलनात नागरिकांनी मोठ्या संख्येने सामील होण्याचे आवाहन केले आहे.