नाशिक-पुणे सरळ रेल्वे मार्गासाठी संगमनेरमध्ये चक्काजाम; रस्त्यावर जनसागर उसळला!

महाराष्ट्र संवाद न्यूज ऑनलाईन
संगमनेर:
नाशिक-पुणे सरळ रेल्वे मार्गासाठी रविवारी क्रांती दिनी संगमनेरमध्ये टोल नाक्यावर चक्काजाम आंदोलन करण्यात आले. यावेळी रस्त्यावर मोठ्या प्रमाणात वाहनांच्या दुतर्फा रांगा लागल्या होत्या दुपारी उशिरापर्यंत ही वाहतूक सुरळीत केली जात होती. तर आपल्या न्याय मागणीसाठी रस्त्यावर जनसागर उसळला होता.
नाशिक पदवीधर मतदारसंघाचे आमदार सत्यजित तांबे यांनी पूर्वी मंजूर झालेल्या सरळ रेल्वे मार्गासाठी जनआंदोलन उभे केले आहे. सत्यजित तांबे यांनी स्वतः समृद्धी महामार्गावर तर राज्याचे माजी मंत्री बाळासाहेब थोरात, माजी आमदार डॉ. सुधीर तांबे, जयश्री थोरात यांच्या नेतृत्वाखाली नाशिक-पुणे राष्ट्रीय महामार्गावर संगमनेरमध्ये हिवरगाव पावसा येथील टोल नाका येथे आंदोलन करण्यात आले. पद्मश्री रघुवीर खेडकर यांच्यासह राहुल गांधी समर्थक संघ, छात्र भारती, संगमनेर शिवसेना (ठाकरे), रेल्वे कृती समिती, वंचित बहुजन आघाडीच्या प्रवक्त्या उत्कर्षा रूपवते आदींसह सर्वपक्षीय नेते कार्यकर्ते यावेळी मोठ्या प्रमाणात उपस्थित होते.
यापूर्वी केंद्रीय स्तरावर मंजुरी मिळालेल्या नाशिक पुणे रेल्वे मार्ग रद्द करत या मार्गात मोठा बदल करण्यात आला. वास्तविक नाशिक पुणे ही दोन मोठी शहरे या मार्गाने जोडली जाणार होती मात्र जवळचे अंतर सोडून हा रेल्वे मार्ग दूरच्या नाशिक शिर्डी अहिल्यानगर पुणे असा मंजूर करण्यात आला आहे या विरोधात मोठ्या प्रमाणात असंतोष निर्माण झाला आहे. आधीच्या प्रस्तावित रेल्वे मार्गासाठी संगमनेर तालुक्यातील २६ गावांमधील २८५ हेक्टरचे भूसंपादन करण्यात आले त्याचा मोबदला म्हणून शेतकऱ्यांना ६८४.६२ कोटी रुपये वाटण्यात आले. रेल्वेमार्गाच्या कामाने वेग घेतला असतानाच राज्यातील सरकार बदलले आणि जवळचा असलेला सरळ प्रस्तावित रेल्वे मार्ग देखील बदलण्यात आला. परिणामी सिन्नर अकोले संगमनेर नारायणगाव खेड मंचर चाकण या सर्व तालुक्यांमध्ये मोठी नाराजी निर्माण झाली.
आमदार सत्यजित तांबे यांनी सुरुवातीचा सरळ रेल्वे मार्गासाठी जन आंदोलनाची हाक दिल्यानंतर त्यांना मोठा प्रतिसाद मिळाला संगमनेरसह सिन्नर, नारायणगाव, आळेफाटा जुन्नर, मंचर, खेड, चाकण येथील सगळे नागरिक एकवटले असून या जनआंदोलनाच्या माध्यमातून नाशिक पुणे मार्गावर ठिकठिकाणी रविवारी चक्काजाम आंदोलन करण्यात आले.
संगमनेरमधील टोल नाक्यावर झालेल्या आंदोलनात राज्याचे माजी मंत्री बाळासाहेब थोरात, माजी आमदार डॉ. सुधीर तांबे, जयश्री थोरात, पद्मश्री रघुवीर खेडकर, अनिकेत घुले यांच्यासह विविध वक्त्यांची भाषणे झाली. या सर्वांनी प्रस्तावित नव्या मार्गाला विरोध दर्शवत जुन्याच सरळ मार्गाने रेल्वे मंजूर करण्याची मागणी केली आहे. या मागणीसाठी मोठा जन लढा उभारण्याचा इशारा देण्यात आला आहे.