श्री सोमेश्वर रंगारगल्ली मित्र मंडळ गणेशोत्सवाची नूतन कार्यकारी कार्यकारिणी जाहीर; नव्या पदाधिकाऱ्यांमध्ये यांचा आहे समावेश

महाराष्ट्र संवाद न्यूज ऑनलाईन
संगमनेर:
शेकडो वर्षांची ऐतिहासिक व सांस्कृतिक परंपरा लाभलेल्या संगमनेरच्या मानाच्या पहिल्या गणपती श्री सोमेश्वर रंगारगल्ली मित्र मंडळाच्या गणेशोत्सव २०२६ च्या अध्यक्षपदी रोशन आमले यांची सर्वानुमते निवड करण्यात आली आहे.
रंगारगल्ली येथील श्री लक्ष्मीनारायण मंदिरात मंडळाच्या ज्येष्ठ मार्गदर्शकांच्या उपस्थितीत पार पडलेल्या बैठकीत गणेशोत्सवाच्या नियोजनाबाबत सविस्तर चर्चा करून नूतन पदाधिकाऱ्यांची बिनविरोध निवड करण्यात आली.
या नूतन कार्यकारिणीत कार्याध्यक्षपदी अभिजीत पाटणकर, तर उपाध्यक्षपदी संकेत काजळे व ऋषिकेश पवार यांची निवड करण्यात आली आहे. सचिवपदाची जबाबदारी अक्षय ढोरे यांच्याकडे तर सहसचिवपदाची जबाबदारी प्रथमेश गरुडकर यांच्यावर सोपवण्यात आली आहे.
मंडळाच्या तिजोरीची धुरा खजिनदार देवेंद्र काळे व कैलास बुरसे सांभाळणार असून प्रकल्पप्रमुख म्हणून अमोल डुकरे व कुंजल कांबळे यांची नियुक्ती करण्यात आली आहे. तसेच आगामी गणेशोत्सवातील मिरवणूक प्रमुख म्हणून शुभम आमले व योगेश काजळे कामकाज पाहणार आहेत.
सर्व नवनिर्वाचित पदाधिकाऱ्यांचे मंडळाच्या वतीने अभिनंदन करण्यात आले असून यंदाचा गणेशोत्सव परंपरा, संस्कृती आणि सामाजिक बांधिलकी जपत अधिक भव्य, शिस्तबद्ध व भक्तिमय वातावरणात साजरा करण्याचा निर्धार सर्व उपस्थितांनी व्यक्त केला.