स्थानिक गुन्हे शाखेच्या पोलिसांचा मोठा स्ट्राईक! कोम्बिंग ऑपरेशनमध्ये तिघांना ठोकल्या बेड्या, हे कारण आले समोर!

महाराष्ट्र संवाद न्यूज ऑनलाईन:

अहिल्यानगर जिल्ह्यात अवैध हत्यारांची तस्करी करणाऱ्यांविरुद्ध स्थानिक गुन्हे शाखेने (LCB) धडक मोहीम उघडली आहे. पोलीस अधीक्षक मुम्मका सुदर्शन यांच्या आदेशानुसार राबवण्यात आलेल्या विशेष कोम्बिंग ऑपरेशनदरम्यान भिंगार कॅम्प आणि जामखेड परिसरातून दोन गावठी कट्टे, चार जिवंत काडतुसे, स्टील मॅगझीन आणि दोन मोबाईल असा तब्बल १ लाख ७० हजार रुपयांचा मुद्देमाल जप्त करण्यात आला आहे. या प्रकरणी बिहारमधील एका तरुणासह तिघांना बेड्या ठोकल्या असून, एक संशयित पसार झाला आहे.

बिहारचा तरुण जाळ्यात – बिहार मधील एक तरुण गावठी कट्टा विक्रीसाठी भिंगार नाला परिसरात आल्याची माहिती मिळताच स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखालील पथकाने १२ ऑगस्टच्या रात्री भिंगार कॅम्प हद्दीत कोम्बिंग ऑपरेशन सुरू केले. पोलिसांनी तात्काळ परिसरात लावलेल्या सापळ्यामध्ये विकास कमल यादव (वय १८, रा. बिहार) आणि ओमकार अनिल शिंदे (वय २१, रा. अहिल्यानगर) या दोघांना ताब्यात घेतले. त्यांची झडती घेतली असता त्यांच्याकडून १ गावठी कट्टा, २ जिवंत काडतुसे, स्टील मॅगझीन आणि २ मोबाईल (एकूण मूल्य १ लाख १९ हजार रुपये) जप्त करण्यात आले.

जामखेडमध्ये हद्दपार गुन्हेगाराला गावठी कट्ट्यासह ठोकल्या बेड्या – दुसऱ्या कारवाईत जामखेड पोलीस ठाण्याच्या हद्दीत गुन्हे शाखेने जिल्ह्यातून हद्दपार असलेला सराईत गुन्हेगार सागर बाळू लोखंडे (वय २६, रा. जामखेड) याला रंगेहात पकडले. हद्दपारीचा आदेश मोडून शहरात फिरणाऱ्या सागरकडून पोलिसांनी १ गावठी कट्टा, १ मॅगझीन आणि १ जिवंत काडतूस जप्त केले.

तपासादरम्यान, हा कट्टा कळसपिंप्री (ता. पाथर्डी) येथील गणेश दादासाहेब भवर याच्याकडून विक्रीसाठी आणल्याची कबुली सागरने दिली. या माहितीनंतर पोलिसांनी गणेश भवरविरुद्धही गुन्हा दाखल केला असून, त्याचा शोध सुरू आहे.

दोन्ही घटनांप्रकरणी अनुक्रमे भिंगार कॅम्प आणि जामखेड पोलीस ठाण्यात भारतीय हत्यार कायद्यान्वये गुन्हे नोंदवण्यात आले असून, पोलीस पुढील तपास करत आहेत.