स्थानिक गुन्हे शाखेची संगमनेरमध्ये धडक कारवाई; ११ गोवंशीय जनावरांची सुटका, १ लाख ७० हजार रुपयांचा मुद्देमाल जप्त

महाराष्ट्र संवाद न्यूज ऑनलाईन

संगमनेर: 

संगमनेर शहरातील रहेमतनगर भागातील आर. के. प्लॉटींगजवळील काटवनात कत्तलीच्या उद्देशाने बेकायदेशीरपणे डांबून ठेवलेल्या ११ गोवंशीय जनावरांची सुटका करण्यात अहिल्यानगर स्थानिक गुन्हे शाखेला (LCB) यश आले आहे. या प्रकरणी संगमनेर शहर पोलीस ठाण्यात गुन्हा दाखल करण्यात आला असून सुमारे १ लाख ७० हजार रुपयांचा मुद्देमाल जप्त करण्यात आला आहे.

अहिल्यानगर जिल्ह्याचे पोलीस अधीक्षक मुम्मका सुदर्शन यांनी जिल्ह्यातील गोवंशीय जनावरांची अवैध वाहतूक व कत्तल करणाऱ्यांवर कडक कारवाई करण्याचे आदेश स्थानिक गुन्हे शाखेला दिले होते. त्यानुसार स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली एक विशेष पथक तयार करून रवाना करण्यात आले होते.

सोमवारी (१७ ऑगस्ट) हे तपास पथक संगमनेर शहर पोलीस ठाण्याच्या हद्दीत अवैध धंद्यांची माहिती घेत असताना, रहेमतनगरजवळील आर. के. प्लॉटींगच्या बाजूला असलेल्या काटवनात काहींनी विना चारा-पाण्याशिवाय गोवंशीय जनावरे बांधून ठेवल्याची गुप्त बातमी मिळाली. या बातमीच्या आधारे पथकाने पंचासमक्ष सदर ठिकाणी छापा टाकला. त्यावेळी कत्तलीच्या उद्देशाने डांबून ठेवलेली ११ लहान-मोठी गोवंशीय जनावरे आढळून आली. पोलिसांनी तात्काळ ही सर्व जनावरे ताब्यात घेतली.

घटनास्थळाच्या आसपास राहणाऱ्या लोकांकडे या जनावरांच्या मालकांबाबत चौकशी केली असता कोणतीही ठोस माहिती मिळाली नाही. जप्त करण्यात आलेल्या जनावरांची एकूण किंमत १,७०,००० रुपये आहे. या प्रकरणी संगमनेर शहर पोलीस ठाण्यात गु.र.नं. ७८९/२०२६ नुसार महाराष्ट्र पशुसंरक्षण अधिनियम (१९९५ सुधारित २०१५) चे कलम ५ (अ)(ब), ९ सह प्राण्यांना निर्दयतेने वागवणे कायद्याचे कलम ३ व ११ प्रमाणे गुन्हा दाखल करण्यात आला आहे. या जनावरांच्या मालकाचा शोध व पुढील तपास संगमनेर शहर पोलीस करत आहेत.

सदर यशस्वी कारवाई पोलीस अधीक्षक मुम्मका सुदर्शन, पोलीस निरीक्षक संतोष मुटकुळे यांच्या सूचनेनुसार पोलीस उपनिरीक्षक विकास जाधव, पोलीस अंमलदार गणेश लोंढे, योगेश कर्डीले, बाळासाहेब गुंजाळ व रोहित येमुल यांच्या पथकाने केली आहे.