अहिल्यानगर जिल्ह्यामध्ये सुरू असलेल्या बेकायदेशीर आणि अवैध व्यवसायांचे कंबरडे मोडण्यासाठी स्थानिक गुन्हे शाखेने (एलसीबी) धडक मोहीम हाती घेतली आहे. पोलीस अधीक्षक मुम्मका सुदर्शन यांच्या थेट आदेशानंतर एलसीबीच्या पथकांनी मंगळवारी एकाच दिवशी संगमनेर शहर, नेवासा आणि श्रीरामपूर तालुका पोलीस ठाण्याच्या हद्दीत तब्बल ११ वेगवेगळ्या ठिकाणी धाडी टाकल्या. या धडक कारवाईत जुगार आणि अवैध दारू विक्री करणाऱ्यांचे अड्डे उद्ध्वस्त करण्यात आले असून, एकूण ४४ हजार ६५० रुपयांचा मुद्देमाल जप्त करत ११ गुन्हे दाखल करण्यात आले आहेत.
जिल्ह्यातील अवैध व्यावसायिकांची पाळेमुळे खणून काढून त्यांच्यावर कडक कारवाई करण्याचे स्पष्ट निर्देश पोलीस अधीक्षक मुम्मका सुदर्शन यांनी दिले होते. या आदेशानुसार स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली विशेष मोहीम आखण्यात आली. यासाठी पोलीस उपनिरीक्षक संदीप दरवडे यांच्यासह निळकंठ कारखेले, सोमनाथ झांबरे, राहुल डोके, बाळासाहेब गुंजाळ, रणजीत जाधव, सुनील मालणकर, भगवान धुळे, बाळासाहेब नागरगोजे, भगवान सानप, आजिनाथ पाखरे, किशोर शिरसाठ, महादेव भांड, राहुल द्वारके, शाहीद शेख, अभिजीत अरकल, अरुण गांगुर्डे, अशोक लिपणे आणि योगेश कर्डीले या कर्मचाऱ्यांची तीन स्वतंत्र पथके तयार करून जिल्ह्यात रवाना करण्यात आली होती.
या तीनही पथकांनी काल मंगळवारी (१८ ऑगस्ट) दिवसभर संगमनेर, नेवासा आणि श्रीरामपूर परिसरात मिळालेल्या गुप्त माहितीच्या आधारे अचानक छापे मारले. संगमनेर शहर पोलीस ठाण्याच्या हद्दीत जुगाराच्या एका कारवाईत ९ हजार ९४० रुपयांचा तर दारूच्या तीन कारवायांमध्ये ८ हजार १३० रुपयांचा मुद्देमाल जप्त करण्यात आला. नेवासा पोलीस ठाण्याच्या हद्दीत दारूच्या एका कारवाईत ५ हजार ८९० रुपयांचा मुद्देमाल हस्तगत करण्यात आला. सर्वाधिक कारवाया श्रीरामपूर तालुका पोलीस ठाण्याच्या हद्दीत झाल्या असून, तेथे जुगाराच्या चार कारवायांत १२ हजार १६० रुपये आणि दारूच्या दोन कारवायांत ८ हजार ५३० रुपयांचा माल जप्त करण्यात आला. एलसीबीच्या या अचानक झालेल्या थेट कारवाईमुळे जिल्ह्यातील अवैध व्यावसायिकांचे धाबे दणाणले आहेत.
