युरियाचा काळाबाजार: संगमनेरमध्ये कृषी विभागाची धडक कारवाई; विनाबिल खतविक्री अन् अनधिकृत साठा जप्त

महाराष्ट्र संवाद न्यूज ऑनलाईन

संगमनेर:

रासायनिक खतांचा काळाबाजार रोखण्यासाठी कृषी विभागाने आक्रमक पावले उचलली असून, संगमनेर तालुक्यातील चंदनापुरी येथे शिवकृपा कृषी सेवा केंद्रावर धडक कारवाई करण्यात आली आहे. अनधिकृत ठिकाणी खतसाठा करून शेतकऱ्यांना बिल न देता युरियाची विक्री केली जात असल्याचा धक्कादायक प्रकार या कारवाईत उघडकीस आला. या कारवाईदरम्यान ३ हजार ७२४ रुपये किमतीच्या युरियाच्या १४ गोण्या जप्त करण्यात आल्या असून, संबंधित दुकानदारावर तालुका पोलीस ठाण्यात गुन्हा दाखल करण्यात आला आहे.

चंदनापुरी येथील शिवकृपा कृषी सेवा केंद्रात युरियाची गाडी उतरवून त्याची छुप्या मार्गाने विक्री सुरू असल्याची पक्की माहिती कृषी विभागाला मिळाली होती. या माहितीच्या आधारे उपविभागीय कृषी अधिकारी अक्षय गोसावी, तंत्र अधिकारी किरण विरकर आणि गुण नियंत्रण अधिकारी ओमकार यन्नम यांच्या पथकाने तातडीने घटनास्थळी छापा टाकला. त्यावेळी काही शेतकरी युरियाच्या बॅगा घेऊन जात असल्याचे पथकाच्या निदर्शनास आले. दुकानासमोर उभ्या असलेल्या एका शेतकऱ्याकडे आर.सी.एफ. कंपनीच्या युरियाच्या दोन बॅगा मिळून आल्या. कृषी अधिकाऱ्यांनी चौकशी केली असता, त्याने हे खत याच दुकानातून खरेदी केल्याचे सांगत दुकानदाराने बिल दिले नसल्याची माहिती दिली.

या प्रकारानंतर पथकाने दुकानमालक मंगेश रहाणे यास बोलावून दुकाची झाडाझडती घेतली. तपासादरम्यान रासायनिक खतांच्या विक्रीची अधिकृत बिले न देणे, बिलांच्या नोंदींमध्ये फेरफार असणे आणि पॉस (POS) मशीनवर युरियाच्या साठ्याची नोंद न ठेवणे अशा गंभीर त्रुटी आढळून आल्या. एवढेच नव्हे तर दुकानाशेजारील परवान्यात समाविष्ट नसलेल्या अनधिकृत गाळ्याची तपासणी केली असता, त्यात लपवून ठेवलेला युरियाचा साठा सापडला. दुकानदाराने हा साठा आपलाच असल्याचे मान्य केले.

याप्रकरणी कृषी अधिकारी दत्तात्रय साळुंखे यांच्या फिर्यादीवरून तालुका पोलिसांनी मंगेश रहाणे याच्याविरोधात गुन्हा नोंदवला आहे. नियमांचे उल्लंघन करून काळाबाजार करणाऱ्या या दुकानाचा खतविक्रीचा परवाना कायमचा निलंबित करण्यासाठी वरिष्ठांकडे प्रस्ताव पाठवण्यात आल्याची माहिती तालुका कृषी अधिकारी रेजा बोडके यांनी दिली आहे. कृषी विभागाच्या या कडक कारवाईमुळे तालुक्यातील खतविक्रेत्यांचे धाबे दणाणले आहेत.