संगमनेर तालुक्यातील कौठे मलकापूर येथे औद्योगिक वसाहतीसाठी (एमआयडीसी) प्रस्तावित असलेल्या जागेवर सुरू असलेल्या सौर ऊर्जा प्रकल्पाच्या कामाला विरोध दर्शवत भारतीय जनता पक्षाचे तालुकाध्यक्ष गुलाबराजे भोसले यांच्या नेतृत्वाखाली बुधवारी ग्रामस्थांच्या उपस्थितीत तीव्र आंदोलन करण्यात आले. सौर प्रकल्पाचे काम तातडीने बंद करून सर्व साहित्य जागेवरून हटवण्याची मागणी आंदोलकांनी केली. आंदोलन चिघळल्याने पोलिसांनी भाजप तालुकाध्यक्षासह १० ते १२ पदाधिकाऱ्यांना ताब्यात घेतले.
साकूर पठार भागातील हजारो बेरोजगारांना रोजगाराच्या संधी उपलब्ध व्हाव्यात यासाठी कौठेमलकापूर येथे शेकडो हेक्टर जागेवर एमआयडीसी उभारण्याचा प्रकल्प मंजूर झाला आहे. पालकमंत्री राधाकृष्ण विखे पाटील, माजी खासदार डॉ. सुजय विखे पाटील आणि आमदार अमोल खताळ यांच्या पाठपुराव्यातून हा प्रकल्प मंजूर झालेला असताना, त्याच जागेवर सौर ऊर्जा प्रकल्पाचे काम सुरू झाल्याने महायुतीच्या पदाधिकाऱ्यांनी आणि स्थानिक ग्रामस्थांनी तीव्र संताप व्यक्त केला.
या आंदोलनात बाबासाहेब कुटे, सरपंच रविंद्र दातीर, रणजित ढेरंगे, सोमनाथ बारवे यांच्यासह विविध पदाधिकारी आणि शेकडो नागरिक सहभागी झाले होते. आंदोलनस्थळी सौर प्रकल्पाचा एकही जबाबदार कर्मचारी उपस्थित नसल्याने आंदोलक अधिक आक्रमक झाले. एमआयडीसी रोखण्यासाठीच इथे सौर प्रकल्प आणला गेला आहे का, असा सवाल करत आंदोलकांनी यामागे राजकीय षडयंत्र असल्याचा थेट आरोप केला. भाजप तालुकाध्यक्ष गुलाबराजे भोसले यांनी दोन दिवसांत साहित्य न हटवल्यास जाळपोळ आणि तीव्र आंदोलनाचा इशारा दिला.
परिस्थिती हाताबाहेर जाऊ नये म्हणून पोलीस निरीक्षक बाबासाहेब बोरसे आणि पोलीस उपनिरीक्षक प्रविण महाले यांच्या मार्गदर्शनाखाली मोठा पोलीस बंदोबस्त तैनात करण्यात आला होता. आंदोलकांनी नायब तहसीलदार गणेश आढारी यांना निवेदन सादर केले. सध्या सौर प्रकल्पाचे काम स्थगित करण्यात आल्याची माहिती नायब तहसीलदार आढारी यांनी दिली; मात्र केवळ काम स्थगितीवर समाधान न मानता साहित्य पूर्णपणे हटवण्याच्या मागणीवर आंदोलक ठाम राहिले.
निवेदन दिल्यानंतर आंदोलकांनी थेट सौर प्रकल्पाच्या मशिनरी व साहित्याच्या दिशेने मोर्चा वळवला. कायदा व सुव्यवस्थेचा प्रश्न निर्माण होऊ नये म्हणून पोलिसांनी तत्काळ हस्तक्षेप करत गुलाबराजे भोसले, रणजित ढेरंगे, सरपंच रविंद्र दातीर आणि सोमनाथ बारवे यांच्यासह सुमारे १० ते १२ जणांना ताब्यात घेतले. ताब्यात घेतलेल्या आंदोलकांना घारगाव पोलीस ठाण्यात नेण्यात आले आणि नंतर नोटीस देऊन सोडून देण्यात आले.
