रस्त्याच्या कडेला बंद पडलेल्या टेम्पोला पाठीमागून आलेल्या एका भरधाव फॉर्च्युनर कारने दिलेल्या भीषण धडकेत एका तरुणाचा दुर्दैवी मृत्यू झाला असून एक जण जीवनाशी झुंज देत आहे.
हा थरारक अपघात १८ ऑगस्ट रोजी सायंकाळी को-हाळे शिवारातील उपाध्ये वस्तीजवळ घडला. या घटनेनंतर जखमींना मदत न करता थेट काढता पाय घेतल्याने संगमनेर येथील नामांकित डॉ. सत्यजित निघुते यांच्यावर राहाता पोलीस ठाण्यात गंभीर कलमान्वये गुन्हा दाखल करण्यात आला आहे.
कचऱ्याचे साहित्य घेऊन संगमनेरच्या दिशेने जाणारा टाटा ७०९ टेम्पो बंद पडल्यामुळे चालकाने तो रस्त्याच्या कडेला उभा केला होता. टेम्पो दुरुस्तीचे काम सुरू असतानाच समोरच्या परिस्थितीकडे पूर्णपणे दुर्लक्ष करत भरधाव वेगाने आलेल्या फॉर्च्युनर कारने टेम्पोला पाठीमागून जोरदार धडक दिली.
ही धडक इतकी भीषण होती की त्यात सज्जाद कमालउद्दीन या २३ वर्षीय उत्तर प्रदेशातील तरुणाचा जागीच दुर्दैवी मृत्यू झाला. तर संगमनेर येथील युनूस इस्माईल शेख हे गंभीर जखमी झाले असून त्यांच्यावर सध्या पुण्यात अतिदक्षता विभागात उपचार सुरू आहेत.
अपघाताच्या तीव्रतेमुळे दोन्ही वाहनांचे मोठे नुकसान झाले आहे. मात्र, घटनेचे गांभीर्य ओळखून जखमींना तातडीने रुग्णालयात दाखल करणे किंवा पोलिसांना माहिती देणे गरजेचे असताना, फॉर्च्युनर चालक डॉ. सत्यजित निघुते यांनी घटनास्थळावरून पोबारा केल्याचे फिर्यादीत स्पष्ट म्हटले आहे.
याप्रकरणी इरफान असलम शेख यांनी दिलेल्या तक्रारीवरून राहाता पोलिसांनी फॉर्च्युनर कार चालक डॉ. सत्यजित निघुते यांच्याविरुद्ध भारतीय न्याय संहितेतील कलम १०६(१), २८१, १२५, १२५(ब), ३२४(४)(५) आणि मोटार वाहन कायद्यानुसार गुन्हा नोंदवला आहे. राहाता पोलीस ठाण्याचे प्रभारी अधिकारी दीपक सरोदे यांच्या मार्गदर्शनाखाली पोलीस कर्मचारी पेटारे या घटनेचा पुढील सखोल तपास करत आहेत.
