पत्रकारावर हल्ला करून फरार झालेले तीन आरोपी छत्रपती संभाजीनगरमधून जेरबंद; स्थानिक गुन्हे शाखेची कारवाई

महाराष्ट्र संवाद न्यूज ऑनलाईन
अहिल्यानगर:
वृत्तपत्रामध्ये विरोधी बातम्या छापल्याच्या रागातून आणि अपघाताच्या कारणावरून पत्रकारावर प्राणघातक हल्ला करून पसार झालेल्या तीन सराईत आरोपींना स्थानिक गुन्हे शाखेने छत्रपती संभाजीनगर येथील वाळुंज एमआयडीसी परिसरातून शिताफीने ताब्यात घेतले आहे. ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली करण्यात आली.
मिळालेल्या माहितीनुसार, समतानगर सावेडी येथील पत्रकार सुशिल थोरात (वय ४९) यांच्या कारला २० ऑगस्ट २०२६ रोजी सोनू कोहक याने मोपेडवरून धडक दिली होती. या अपघाताच्या कारणावरून तसेच विरोधी बातम्या लावल्याच्या रागातून सोनू कोहक, पप्पू मते, विकी ढवण, प्रशांत निक्रड आणि त्यांच्यासोबत असलेल्या एका अनोळखी पहिलवानाने पत्रकार थोरात आणि त्यांच्या मुलास लाथाबुक्क्यांनी मारहाण केली. त्यानंतर सोनू कोहक व इतरांनी थोरात यांना खाली पाडून त्यांच्या डोक्यात व पाठीवर दगडाने मारून, गळा दाबून जीवे मारण्याचा प्रयत्न केला होता. या घटनेप्रकरणी तोफखाना पोलीस ठाण्यात भारतीय न्याय संहितेच्या विविध कलमान्वये गुन्हा दाखल करण्यात आला होता.
पत्रकारावरील प्राणघातक हल्ल्याचे गांभीर्य लक्षात घेऊन पोलीस अधीक्षक मुम्मका सुदर्शन यांनी स्थानिक गुन्हे शाखेला तात्काळ आरोपी शोधण्याचे आदेश दिले. त्यानुसार गुन्हे शाखेचे पोलीस निरीक्षक संतोष मुटकुळे यांनी पोलीस उपनिरीक्षक विकास जाधव, संदीप दरवडे आणि दोन विशेष पथके तयार करून आरोपींचा शोध सुरू केला.
सीसीटीव्ही फुटेज, तांत्रिक विश्लेषण आणि गुप्त बातमीदारांकडून मिळालेल्या माहितीच्या आधारे तपास पथक प्रथम राजगुरूनगर (पुणे) येथे पोहचले; मात्र आरोपी तेथून पसार झाले होते. त्यानंतर आज सोमवारी (२४ ऑगस्ट) आरोपी छत्रपती संभाजीनगरमधील वाळुंज, पंढरपूरजवळील एमआयडीसी परिसरात असल्याची पक्की माहिती पथकाला मिळाली. या माहितीवरून पथकाने तात्काळ सापळा रचून आरोपी हेमंत उर्फ सोनू दत्तात्रय कोहक (वय २७, रा. बोल्हेगाव), महेश उर्फ पप्पू दशरथ मते (वय २७, रा. सावेडी) आणि प्रशांत शिवाजी निक्रड (वय २५, रा. सावेडी) या तिघांना ताब्यात घेतले.
पोलिसांनी आरोपींकडे अधिक विचारपूस केली असता त्यांनी पत्रकार सुशिल थोरात व त्यांच्या मुलास मारहाण केल्याची कबुली दिली. पकडण्यात आलेल्या आरोपींपैकी हेमंत उर्फ सोनू कोहक आणि प्रशांत निक्रड हे सराईत गुन्हेगार असून त्यांच्यावर यापूर्वीही तोफखाना पोलीस ठाण्यात गंभीर गुन्हे दाखल आहेत. स्थानिक गुन्हे शाखेने पुढील कायदेशीर कारवाईसाठी तिन्ही आरोपींना तोफखाना पोलिसांच्या स्वाधीन केले असून, या प्रकरणाचा पुढील तपास तोफखाना पोलीस करत आहेत.